Napukan a narra, nasukalan

BANAYOYO, Ilocos Sur – Uppat a pedaso a naragadi a kayo ti narra ti nasarakan iti asideg ti baresbes iti Sitio Greenhills, Barangay Elefante, ditoy nga ili idi aldaw ti Hunio 19.

Mapapati a naipempen santo maibiahe dagiti troso nga agdagup amin iti 17.9 kadapan a mapattapatta nga agbalor iti P3,059.00.

Napukan ti nasao a troso iti municipal nursery babaen dagiti saan pay nga am-ammo a tattao.

Naipaima dagiti nasao a troso ken ni Josefina G. Orpilla, MENRO Officer para iti umno a disposision.

Maiparit ti agpukan iti narra agsipud ta maysa daytoy kadagiti agpeggaden a maibbus a kayo iti pagilian.#