Napukan a tarikayo, nakumpiska

MAGSINGAL, Ilocos Sur – Kinumpiska dagiti police elements ken dagiti miembro ti Community Environment and Natural Resosurces idi bigat ti Mayo 2 ti dua a tarikayo a mapapati nga illegal a napukan iti Sitio Dumpit, Barangay Maratudo ditoy nga ili.

Kalpasan a nakaawat dagiti polis iti telephone call manipud iti maysa a maseknan nga umili, indauluan ni PSI Andrew P. Rabang dagiti polisna ken dagiti kameng ti CENRO nga indauluan ni Marina Tadeja y Tabad a nagturong iti nadakamat a lugar ket natakuatanda a 25 pedaso a mahogany ken 2 a pedaso a pangalanutien ti napukan iti asideg iti maysa a waig iti nadakamat a sitio.

Mapattapatta nga agbalor ti agarup 1,844.60 board feet a tarikayo iti P64,562.40

Naammuan dagiti polis iti panagimbestigada a kukua ti maysa a Marcelino Tabarrejo y Tolentino, 71, naasawaan, ken residente iti Barangay Patong dagiti tarikayo ngem kinuna daytoy a ginatangna dagitoy manipud iti maysa nga Aquiles Udarbe ti Barangay San Clemente ditoy met laeng nga ili ket nakaipayuna payen iti bayadna a P15,000.00.

Kinumpiska dagiti polis dagiti tarikayo idi awan ti maipakita ti akinkukua a dokumento manipud iti CENRO a napalubosan a mangpukan kadagitoy.#