Napuoran a bangkay, di pay nabigbig

BANAYOYO, Ilocos Sur – Saan pay a nabigbig ti bangkay a nasarakan a natupek ken napuoran iti sumrekan ti forestry ditoy nga ili idi agsapa ti Mayo 17.

Iti pannakaisurat daytoy, tagtagiuray ti kapolisan ditoy nga ili ti ipapan panangbigbig ti pamilia ti maysa a babai manipud iti Baguio City a naireport a mapukpukaw.

Pattapatta ti kapolisan ditoy a babai ti akinbangkay agsipud iti pannakarekobre dagiti inbestigador iti sangaparis a sinelas ti babai iti asideg ti lugar a nakasarakan iti biktima.

Kinuna ni Police Chief Inspector Meilani Joy R. Ordono, mangidaulo iti SOCO team a nagimbestiga iti krimen, naipaiman iti kustodia ti Banayoyo Police Station ti sangaparis a berde a sinelas ken naipan iti SOCO office para iti pannakaeksamenna ti kalub ti gallon a a naglaon iti petroleum gas a mapapati a naaramat a pinangbuyat iti biktima sa napasgedan.

Nasarakan ti kalub ti gallon iti asideg met laeng ti entrance ti Banayoyo Forestry.

Kanaig daytoy, nangipatuloden ti Banayoyo Police iti flash alarm kadagiti nadumaduma a police stations para iti pannakabigbig ti bangkay.

Naipan metten ti bangkay iti Toquero Funeral Homes para iti orthodontic examination tapno maammuan ti identidad ti bangkay.

Segun iti polis-Banayoyo, maysa nga Ador Bacagan y Dasiw, 54, naasawaan, mannalon, ken residente iti nadakamat a barangay ti nakaduktal iti natupek ken napuoran a bangkay.

Iti panangisalaysay ni Bacagan, idi agarup 5:30 ti agsapa ti Mayo 17, bayat ti kaaddana iti dalan a mapan iti Banayoyo Forestry, nakaangot iti mapupuoran ket idi sinukimatna ti naggapuan ti asuk, nakitana laengen ti natupek ken mapupuoran a bangkay.

Inreport met ni Danilo Bigwasen y Maludeg, 47, naasawaan, karpintero, ken residente iti Barangay Sitio Greenhills, Barangay Elefante, Banayoyo ti insidente iti kapolisan a nagresponde met a dagus.#