Naputedputed nga akasia, nakumpiska

SANTIAGO, Ilocos Sur – Siam a tattao ti tinengngel dagiti polis gapu iti panagibiaheda nga awan ti permisoda kadagiti naputedputed nga akasia┬á sadiay Barangay Nalasin ditoy nga ili idi malem ti Marso 18.

Tinengngel dagiti polis ti drayber ti Mitsubishi Canter a nagkarga kadagiti naputedputed a kayo ti akasia a nainaganan Wilbert Palacpac y Castillo, 44, naasawaan, residente iti Barangay Balaleng Centro, Bantay, ken dagiti kakaduana a pakaibilangan da George Navarro y Navarro, Christopher Remalos Roqueta, John Paul Navarro y Tabuno, Adolfo Tapat y Navarro, Kevin Tapat y Ulero, Juper Rapisora y Rojas, Romel Montano y Rabino, ken Romeo Montano y Marmoles, agpapada a residente iti Brgy. Lubong, San Vicente, Ilocos Sur.

Kinumpiska met dagiti polis dagiti naputedputed nga akasia idi awan ti maiparang dagiti suspek a dokumento para iti pannakaibiahe dagitoy. Ti laeng cutting permit nga inyisio ni Barangay Captain Fidel D. Segundo ti Barangay Naguimba, Banayoyo, Ilocos Sur a napetsaan, Marso 6, 2014 ti iggem dagiti suspek.

Naipan dagiti suspek, agraman ti lugan ken dagiti kargana iti police station para iti umisu a disposision.#