Footer

Naraut a shabu lab, protektado ti politiko?

NAGUILIAN, La Union -Protektado ti sumagmamano a a pulitiko iti La Union ti naraut a laboratorio ti droga iti Barangay Bimmotobot, ditoy nga ili kas panagsaganada iti sumaruno nga eleksion?

Nangisubmite ni Dip. Tomas Dumpit iti resolusion iti Kamara para iti pannakaimbestiga dagiti lokal  nga opisial ti nasao a barangay ken ili tapno mapudasdasan no adda pannakainaigda iti illegal a panagpartuat iti droga iti naraut a laboratorio.

Mismo nga ili ni Dumpit ti nakaduktalan iti nasao a laboratorio ti droga.

Rinaut dagiti nagtipon a bunggoy ti La Union Police Provincial Office nga indauluan ni Provincial Director Senior Supt. Noli Taliño ken ti Philippine Drug Enforcement Agency (PDEA) Regional Office I babaen ti panangidaulo ni Police Senior Supt. Jane Andres Aunzo ti nasao a laboratorio a naipasdek iti 11-ektaria a compound itay Hulio 9 ket nakasamsamda kadagiti ramen iti panagaramid iti maiparparit a droga.

Inaresto dagiti anti-narcotics operatives dagiti tallo a caretakers a mangbanbantay iti nasao a laboratorio ti droga,   da George Cordero, Andy Tangalin ken Dante Tomas Palaganas.

Pormalen a naipilaan iti kaso dagiti tallo a caretakers.

Karaman dagiti sinamsam dagiti operatiba ti 80 bags a caustic soda, 3 gallon nga organic solvent, 93 containers nga iodine crystal, heater, hydrochloric acid ken red phosphorous.

Kinuna ni Taliño a makapartuat ti 93 containers a iodine crystals iti 180,000 kilos a shabu a mapattapatta nga agpateg iti nasurok a maysa a trillion.

Nakakumpiska pay dagiti raiding teams iti 24 nga LPG tanks, 7 nga electric fan, 32 pails, 148 plastic vats, 22 a lamisaan, 63 a siliasi ken dadduma pay a ramit iti laboratorio.

Kinuna ni Taliño a daytoy ti umuna a maikurkurimed a laboratorio ti droga a naduktalan iti La Union ken posible iti sapasap a rehion.

Innayonna a mabalin a patpatarayen daytoy ti maysa a dakkel a sindikato nga adda pannakainbolbarna iti illegal a panaglakuan iti droga.#