Nasalamaan aglako iti botcha, nakasuan

STO. DOMINGO, Ilocos Sur – Tallo a tattao a nasalamaan dagiti polis a nakalugan iti maysa a traysikel a nagkarga iti botcha idi Agosto 29 ti nasaklangan iti kaso iti provincial prosecutor’s office.

Nakasuan iti panaglabsing iti RA 7394, wenno Consumers Act, da Louie Alquetra, mapapati nga akinbagi kadagiti nakumpiska a botcha,  Mark Mark Anthony Alquetra y Fermato, 27, naasawaan, ken Jaynard Aslor, 24, naasawaan, agpapada a residente iti Barangay Capangpangan, Vigan City.

Nasalamaan dagiti polis, da Mark Anthony Alquetra ken Aslor a mangipuslit koma iti sumurok kumurang 150 kilos a botcha a mapapati a pinarti ni Louie Alquetra a maipan iti Barangay Camestizoan idi Agosto 29 a maideliber iti maysa nga agnagan Flora Peros iti nadakamat a barangay.

Pinaikali ni Provincial Veterinarian Warren Bragado dagiti botcha idinto nga inaresto dagiti polis dagiti suspek.#