Nasapa a rehistrasion, insayangkat ti DepEd

MANILA – Insayangkat ti Department of Education itay Enero 26 ti nasapa a rehistrasion dagiti ageskuela iti public elementary ken secondary schools iti umay nga school year 2013-2014.

Kangrunaan a naipalista dagiti agbasa iti kindergarten, Grade I ken first year high school iti publiko a pagadalan iti elementaria ken sekundaria iti intero a pagilian.

Kinuna ni DepEd Secretary Armin Luistro a naisapsapa ti panagpalista dagiti nasao nga agiskuela tapno awan ti pambar dagiti nagannak a di mangibaon kadagiti annakda iti pagadalan.

Naipalista dagiti ubbing nga agtawen iti 5 iti kindergarten idinto a dagiti agtawen iti 6 ket nailista iti Grade 1.

Mapattapatta a 10 million ti bilang dagiti agbasa iti kindergarten, Grade 1 ken first year high school iti masungad a Hunio.#