sinursuran-banner-sqSinursuranNi Jobert M. Pacnis

Nasiken a Langenlangen ti Kasapulan

Sinursuran ni Jobert M.Pacnis

(Maikadua a paset)

Ket napadasak ken mapadpadasak ita dagita a kinasubeg dagiti ubbing. Kinapudnona, iti kanayonko a panangsita kadakuada (kas adviser ti Supreme Government) iti dida panag-uniporme, panagdadael iti sanikua ti pagadalan, panagsao iti dakes, ken ania man a maikaniwas nga aramidda, adu dagiti makagura kaniak. Adda dita nga agsasaoda iti liklikudak, agisuratda kadagiti makasair a balikas kadagiti pader ken bulbulong dagiti mula iti aglawlaw ken ti diak malipatan, ti panagipangta idi ti maysa nga adalak.

Ngem ti laeng kaniak, ar-aramidek laeng ti pagrebbengak. No mapanuynoyanda, ania ngarud pay ti pagturongan ti pagadalan? Normal laengen ti panagdadael? Ti panagsao ti dakes? Ti mang-bully?

Ammok, paset amin daytoy ti kinamannursuro. Masapul a sanguen. Mabalin a di makita, mautob dagiti ubbing ti pagimbagan dagitoy a pannakadillaw kadakuada. Ngem iti masakbayan, iti masanguanan, dumtengto kadakuada ti pannakalawlawag.

No apay a diak tutopan, ida, kas nakunakon iti kallabes nga isyu, adda dayta kalintegan dagiti ubbing a protektado. Ania man a rason, basolmonto latta a mannursuro no madissuam ida. Masapul ti adu a balon a pasensia nupay marabngisen ti kalintegan met a kas indibidual.

Ngem apay ngamin a diak kayat ti payalis, umalis iti pagadalan nupay bassit laeng ti yanko a pagisuruan?

Malaksid kadagiti napadamgisakon a rason, adda pay nasnasken ngem kadagita.

Ragsak ken pannakapnek iti trabaho. Dayta ti kangrunaan a rason.

Kasano?

Umalisak man iti dakdakkel a pagadalan, isunto laeng nga isu ti sueldo, saan? Standardized ngarud, depende iti posision. No umalisak, saan met a manayonan ti awatek. Kumiro laeng ti sasaadek. Sabali manen a pannakilangen ti sanguen.

Ken ania pay laeng ti sapulek iti yanko ket kaim-immuak aminen a kakaduak? Adda dayta panagkakabsat iti nagbabaetanmi. Gapu ta bassitkami laeng ditoy, arigna agkakabsatkami iti panagtritrinnatomi iti tunggal maysa. Awan panaginkukuna ti langenlangen nga adda kadakami.

Dayta la unay ti pagyamyamanak ta ditoy ti pagub-ubbogan ti pigsa ken kired a mangsaranget kadagiti adu a pannubok ti kinamannursuro.

No awan dayta ragsak, panagkakabsat ti agkakatrabahuan, ania koma ti serserbina ti kaadda iti dakkel nga institusion?

Puera delos buenos, kas kunada, adu dagiti dadakkel a pagadalan iti agdama nga arig di agaammo dagiti empleadona. Magrupogrupoda pay. Agkakakuartoan dagiti agpapareho iti Major nga idauluan ti Master teacher.

Itoy a situasion, saan a maliklikan dayta panagpipinnatayok iti isbo, panangsarsarita kadagiti kakaduada ken pinnabasol no adda pagkamalian a mapasamak iti pagadalan.

Banag a nagalas a kitaen!

Naimbag, kas nasaokon, iti bassit laeng a pagadalan, agaammo ti amin. Agkakabsat ti pangibilbilanganda iti tumunggal maysa. Agkaykaysada iti panangpataray ti pagadalan. No adda pagbiddutan, basol ti amin. Awan ti mapabpabasol.

Ket daytoy a nasiken a langenlangen ti kangrunaan la unay a diak pakapanawan ti agdama a yanko. Saan a bale nga addaak iti sabali nga ili ta kabaelak met ti agawid-awid latta iti pamiliak ta agarup kinse minuto laeng a tarayen ti motorsiklo manipud balay agingga iti eskuela.

Mamatiak la unay a daytoy a kinnayammet a makitkita dagiti ubbing, adda dakkel nga epektona iti panagadalda. Ad-adda nga ipategda ti ‘yanda ta makitkitada ti panagkaykaysami a pannakaama, pannakainada para iti pagimbaganda.

Maigunamgunam koma ngarud kadagiti dadakkel a pagadalan a kitaenda daytoy nga aspeto. Ta uray kasano kinamodernon ti panawen, agnanayon latta a dagiti mannursuro ti maysa a modelo dagiti ubbing. Ket no makitada, mariknada ti makunkuna a factionalism kadagiti mannursuroda, saan ngata a dakkel a pakapagganganda nga agadal? Wenno pakaikkatan ti respetoda kadagiti titserda?

Wen, agingga a kayatdak ditoy nakaidestinuak, ditoyak lattan. Saan a magatadan ti ragsak a gubgubbuayen ti kinasingedmi iti tumunggal maysa. Ken mariknak la unay ti kinapasetko iti daytoy a lugar kas ipakpakita dagiti agindeg. Ania pay ngarud ita ti sapulek?