sinursuran-banner-sqSinursuranNi Jobert M. Pacnis

Nasiken a Langenlangen ti Kasapulan

Sinursuran ni Jobert M.Pacnis

(Umuna a paset)

DIKA ket koma umalis iti dakdakkel a pagadalan?

Saan laeng a namnaminsan a nasaludsod/naisingasing dayta kaniak. Nga ammok lattan nga iti ilimi, iti mismo a nagturposak, ti kayatda a sawen a papanak wenno pagalisak.

Wen, umalisakto… ‘ton didakon kayat iti ‘yanko, kunaek laeng met nga isungbat.

Ngem apay koma nga umalisak a kunada?

As-asideg a pagudaodan iti inaldaw; adda iti sentro ket adu ti mabuya, magatang ken kunaen kad’ lattan nga asideg iti sibilisasion; kakinnaawatan dagiti ubbing ken dagiti nagannak— dagita ti mabalin a rasonda.

Tunggal maysa, kangrunaan dagiti mannursuro, awan sabali nga arapaapda no di ti makasapul ti pagserkanda nga asideg iti pagtaenganda. No mabalin, saanda koman a maidestino idiay SSS wenno selselsel a kunada. Umuna a rason ditan ti pannakadennada ti pamiliada. Ken maikadua, saandan a magastuan (iti kasera, makan, ken plete) pay. Ngem ania ngarud, narigat met a kasta a dagus. Iti elementaria, adda dayta maipalladaw nga umuna iti SSS sa in-inut a mairuar wenno maipan iti bukodna a barangay wenno iti kaarrubana.

Dayta ket uray no iti mismon a pagindeganna ti yan ti bakante!

Ti mapasamak, mairuar ti/dagiti immuna a naipalapal iti SSS ket maisullat kadakuada dagiti kabarbaro a serrek. Kasla maysa daytoy nga addang a pakasuotan dagiti mannursuro no napudnoda met laeng iti sinapataanda.

Ania pay ngarud no kua ti maaramid ni mannursuro? Awatenna a sipupuso ti asaymentna ta uray kaskasano, addan panggedanna ket makatulongen iti pamiliana.

Ita, dayta met as-asideg iti sentro wenno sibilisasion, kas naynay a mangmangngegan. Addada dagiti maal-alimadamad, masaksaksiantayo nga agkunkuna a boring ti mangisuro iti SSS. Dika makaaliwaksay, awan paggatangan ken/wenno pagpalpallailangan.

Ken aglalo a boring wenno makatuok no awan ti suplay ti kuriente!

Ngem aduda met ketdi ti agkuna a “mas enjoy” ti agserbi iti SSS. Wen, pudno nga awan pagpallailangan a kas koma kadagiti mall, parke, internet café ken dadduma pay. Ngem adda kano met ti nakaparsuaan a pagub-ubbogan ti kired ken talinaay ti riknada. Iti laeng panangmingmingda iti nakaparsuaan (bantay, baresbes, karayan, pusuak, baybay, kakaykayoan), umassibay kadakuadan ti nagpaiduma nga ilalag-an ti rikna ket maleplepan ti iliw iti napanawanda a pamilia.

Naimbag kano pay iti SSS ta sadiwa, presko dagiti taraon. Kaisang-at, kakalkalap a lames wenno ikan; kappuros a natnateng ken dingo (aglalo dagiti manok) a kattiliw. Ania pay ti sapulem kadagita nga adda laeng iti asideg ti nakaidestinuam?

Kastaak met laeng. Gapu ta matantan-awan ti baybay no kasta nga agisuroak, nagmayat man ti rikna iti inaldaw nupay addada dagiti subeg nga adalan nga isu ti bugas ti kinamannursuro. Iti batogmi, ket magnada iti sango ti ruangan ti pagadalan, ti pagsang-atan dagiti mapan agkalap. Kaaduanna ngarud a sadiwa dagiti ikan a mayawidko iti pamiliak no kasta a malem ta adda met refrihadura ti pagadalan a pagidulinan pay laeng.

No met nateng, gapu ta adda bakante a solar iti likud ti pagadalan, isu ti an-anusak (sabali laeng ti nairanta a para iti TLE subject) a mulmulaan a pagap-apitak iti yawidko a madengdeng wenno masalad. Numero uno laeng a kalabanko ti paras ti angin ti baybay. Kessetenna dagiti mulak. Ngem awan sabali a panglabanko no di ti panagaladko iti kawkawwati tapno makerrasan ti epekto ti naapgad nga angin no kasta a kaparasna.

Kakinnaawatan dagiti ubbing ken dagiti nagannak. Kayatda a sawen, kapadpada iti nariingan a pagsasao. Iti ngamin nakaipalladawak, kaaduanna ti saan nga Ilokano. No agsaoda, diak ida a maaw-awatan. Masapul nga agdamagak pay kadagiti dadduma. Aglalo ket addada dagiti ubbing a no didan kinayat ti maestroda wenno maestrada, wenno no naungtandan, agsaodan iti pagsasaoda. Ti dakesna, pagsasawandaka gayamen a saanmo nga am-ammo.

Ngem iti maysa a napudno a mannursuro, karit daytoy a masapul a sanguenna. Adalenna no kasano a makasunguanna dagiti adalanna ken dagiti nagannak dagitoy a kaaduan a kunsintidor no maminsan.

(Adda tuloyna)