Nasken kadi ti Reserved Officers’ Training Corps?

Salaysay ni Eden A. Alviar

 

KAYAT ti administrasion ni Presidente Rodrigo Duterte nga isubli ti Reserved Officers’ Training Corps (ROTC) a mandatory requirement kadagiti lallaki a nasayaat ti salun-atda tapno makaturposda iti kurso ti kolehio tapno marubroban ti nasionalismo wenno panagayat ti pagilian.

Panggep ti ROTC nga ikkan ti military education ken training dagiti estudiante kas panagsagana iti nailian a depensa. Dagiti estudiante a kadete ket maisaganada nga agserbi iti Armed Forces of the Philippines no adda kellaat a panagkasapulan ket masanayda a reserba a mabalin a commissioned officer ti AFP. Dagiti makaturpos iti ROTC Advance Program ket mabalinda ti agserbi kadagiti amin a sanga ti AFP.  Iti agdama a kadagupan dagiti opisial iti AFP ket 75% ti nagturpos iti ROTC Advance Program, ken dagiti dadduma a commissioned officer ket dagiti nagturpos iti Philippine Military Academy ken AFP Candidate Officer Course.

Dagiti ROTC student-cadet ket agadalda iti kolehio kas met laeng dagiti kadawyan nga estudiante ngem agdalanda iti military training manipud iti branch of service a mangimaton ti ROTC unit ti pagadalan. Ti student-cadet ket agdalan iti regular ROTC instruction kabayatan ti school year – Basic ROTC wenno Advance ROTC.  Adda pay ti ROTC Summer Camp Training ken Advance ROTC Academic Phase Training

Dagiti ROTC unit kadagiti unibersidad ken kolehio ket nabukel babaen ti Department of Military Science and Tactics iti panangbayabay ti school administration ken ti Department of National Defense. Dagiti ROTC unit ket idauloan dagiti aktibo nga opisial ti AFP ken reservist a mangibagi kadagiti major services – Army Reserve Command,  Navy Reserve Command ken Air Force Reserve Command.

Nangrugi ti ROTC iti Pilipinas idi 1912 idi iyusuat ti Philippine Constabulary ti military instruction sadiay University of the Philippines. Kiniddaw idi ti UP Board of Regents babaen ti panangirepresntar ti Governor-General iti United States Department of War, ket nagun-odda ti serbisio ti US Army officer kas propesor ti Military Science. Idi 1936, ti Office of the Superintendent for ROTC Units ti Philippine Army ket nabukel a mangbayabay kadagiti amin nga ROTC unit iti pagilian.

Inyetnag ni Pres. Manuel L. Quezon ti Executive Order No. 207 idi 1939 tapno mayimplentar ti National Defense Act of 1935, wenno Commonwealth Act No. 1, ti nakaipalaonan ti National Defense Plan nga inaramid ni Gen. Douglas MacArthur. Ti Executive Order ket pinagbalinna ti ROTC nga obligasion dagiti agad-adal kadagiti amin a kolehio ken unibersidad nga addaan ti 100 agpangato nga estudiante.

Idi Maikadua a Gubat iti Lubong, 33 a unibersidad ken kolehio iti Pilipinas ti nangbukel kadagiti ROTC unit a nakigubat. Dagiti kameng ti ROTC unit iti Manila ket nakigubatda sadiay Bataan. Dagiti met kadete iti Visayas ken Mindanao ket nairamanda iti 755th Infantry Regiment ti US Army Forces in the Far East.  Dagiti nagboluntario a kadete iti PMA ken dadduma pay nga ROTC ket binukelda ti Hunters ROTC guerrilla a nakiranget kadagiti Hapon kabayatan ti panangsakupda iti Pilipinas.

Idi Septiembre 13, 1946, pinagbiag ti Philippine Army Headquarters dagiti ROTC unit idi sakbay ti gubat. Ti Philippine Army ket nagbalin nga Armed Forces of the Philippines idi Disiembre 23, 1950. Idi Pebrero 8, 1967, inyetnag ni Pres. Ferdinand Marcos ti Executive Order No. 59  a nangimandar a ti ROTC ket inkapilitan kadagiti amin a kolehio ken unibersidad nga addaan iti 250 agpangato a lallaki nga estudiante.

Mairaman kadagiti prominente a nagturpos iti ROTC program ket ni Gen. Alfredo M. Santos, AFP Chief of Staff idi 1962 – 1965; Gen. Rigoberto J. Atienza, maika-9 nga AFP Chief of Staff a nakaipanaganan ti Camp Atienza iti Quezon City; Gen. Romeo C. Espino, ti kapautan a nagserbi nga AFP Chief of Staff idi 1972 – 1981, ken Gen. Fabian C. Ver a nagserbi nga AFP Chief of Staff ni Pres. Marcos idi 1981 – 1986, ken Director-General ti National Intelligence Coordinating Agency. Ni Santos ket nagturpos iti Mapua Institute of Technology. Agpapada met a nagadal iti UP da Atienza, Espino ken Ver.

Adu pay nga opisial ti AFP ti nagtaud iti ROTC program a nagserbi iti pagilian. Bimmassit laengen dagiti kadete ti ROTC idi napagbalinen daytoy nga optional gapu ti protesta a pinataud ti pannakatay ti Cadet Mark Welson Chua ti University of Santo Tomas.  Idi Marso 18, 2001, natakuatan ti bangkay ni Chua a tumtumpaw iti Pasig River. Sakbay ti pannakatayna, kaduana ti sabali nga estudiante ti nangireklamo ti kurapsion iti UST ROTC iti student publication ti unibersidad. Iti imbestigasion ti National Bureau of Investigation, nayetnag nga adda opisial iti UST ROTC ti responsible iti pannakapapatay ni Chua. Ti pimmatay ket naidarum ken nasentensian tallo a tawen kalpasan ti krimen.

Dayta a pagteng ti nangsilmut ti nabara a protesta kontra ti ROTC dagiti student association, school administrator ken dadduma pay a cause-oriented group. Ti Kongreso ket nangiyusuatda kadagiti gakat ken resolusion kas sungbat iti kalikagum a pannakaikkat ti ROTC.         Ti Republic Act 9163, wenno “National Service Training Program Act of 2001,” ti inaramid ti Kongreso kas sungbat iti kalikagum dagiti umili.  Naaramid daytoy kabayatan ti maika-12 a Kongreso idi Enero 23, 2002. Babaen iti NSTP Program, dagiti babbai ken lallaki nga estudiante ti amin a kurso iti kolehio ket obligado nga agatender ti maysa kadagiti tallo a programa pakaibilangan ti ROTC. Napagbalin langen nga optional ti ROTC.

Manipud 2006, adu dagiti bill a nayusuat idiay Kamara de Representante ken Senado para ti pannakaisubli a mandatory requirement ti ROTC para kadagiti agad-adal iti kolehio.  Kiniddaw pay idi 2013 ni sigud a National Defense Secretary Voltaire Gazmin a nasken ti pannakaisubli ti ROTC a mandatory requirement kadagiti agad-adal iti kolehio. Ngem saan a napatgan dagita a gannuat.

Iti agdama, ikagkagumaan ti Duterte Administration ti panagbalin manen a mandatory ti ROTC para kadagiti estudiante ti kolehio ta kasapulan unay a mapasubli ti nasionalismo dagiti agtutubo ken wagas metten ti pannakaipaganetget ti disiplina ken pannakayadayo kadakuada kadagiti dakes a bisio. Kasapulan pay daytoy a pagtaudan ti reserba a puersa ti AFP gapu kadagiti nagduduma a pangta ti seguridad iti pagilian.

No mapasublinto ti ROTC kas mandatory requirement iti panagadal ti kolehio, nasken a mapatalgedan a saanton a mausar a training ground ti kurapsion ken kinadakes dagiti manamnama nga agbalinto a sanggir ti pagilian iti masakbayan.#