Nasken nga agtultuloy ti tax exemption dagiti kooperatiba tapno dumur-asda – NSCC CEO

Divina Quemi, the Chief Executive Officer (CEO) of the Nueva Segovia Consortium of Cooperatives (NSCC)
FILE PHOTO: Divina Quemi, the Chief Executive Officer (CEO) of the Nueva Segovia Consortium of Cooperatives (photo by Edward B. Antonio)

CAOAYAN, Ilocos Sur – Nasken nga agtultuloy ti tax exemption dagiti amin a kooperatiba iti Pilipinas tapno dumur-asda, ken matulongan dagiti miembro nga agprogreso ti kasasaadda; ket masapul a mairupir dayta iti Kongreso ta adu latta dagiti opisial ti gobierno ti agtarigagay a mabuisan dagiti sugponan tapno ad-adu ti makolekta nga ingreso. 

Dayta ti panangilawlawag ni Ms. Divina Quemi, Chief Executive Officer ti Nueva Segovia Consortium of Cooperatives, kadagiti kameng ti Ilocos Sur Integrated Press iti naangay a Kapihan iti Amianan Media Forum.

Inlawlawagna nga uray no saan a natuloy a nairaman a mabuisan dagiti kooperatiba gapu ti napasnek a panag-lobby sadiay Kongreso dagiti lider ti sugponan iti intero a Pilipinas, ken suporta dagiti kongresista ken senador, ket adda latta dagiti opisial ti Executive Branch ti mangidardarirag ti pannakaikkaten ti cooperative tax exemption tapno ad-adu ti makolekta ti gobierno a buis.

Sinalaysay ni Ms. Quemi a pudno nga adun dagiti dadakkel wenno babaknang a kooperatiba iti Pilipinas kas ti NSCC nga addaanen iti P3.8 Billion nga assets, ngem ad-adu nga amang dagiti sugponan a narigat ti kasasaadda a nasken a tulongan ken suportaran ti gobierno ken padada a kooperatiba tapno saanda nga agserra.

Impakaammona a ti panagamak dagiti lider ti kooperatiba ti maysa a nangiduron kenkuana a nangawat ti nominasion kas Coop Natco Partylist representative para iti May 13, 2019 National and Local Elections ta no ipalubos ti Dios a mapagasatan ket ad-adu ti maitulongna iti pannakapapigsa dagiti kooperatiba ken pannakapadur-as ti biag dagiti Pilipino. 

Impakaammo ni Ms. Quemi a maikatlo isuna a nominado ti Coop Natco Partylist iti House of Representatives. Inlawlawagna a nakipagkinnonsulta kadagiti kameng ti Board of Directors ti NSCC, pamilia ken kadagiti spiritual advisers-na, ken pinanunotna a nasayaat sakbay nga inawatna ti nominasion para iti party list. 

Linagip ni Ms. Quemi ti nangrugianna kas loan officer ti Caritas Nueva Segovia ken ti NSCC manipud idi nabukel idi 1992, nga addaan laeng iti tallo nga empleado, ken bassit puonan, ngem babaen ti tulong ti Dios, ken dagiti kameng ti kooperatiba iti salinong ti Simbaan Katolika, ket nagbalinen daytoy a multi-billion cooperative. Impanakkelna a ti NSCC ket addaanen iti nasurok a 40,000 a miembro; ken 15 a branch iti Ilocos Sur, Ilocos Norte, La Union, Baguio City, Pangasinan ken Metro Manila. Impakaammona a ti NSCC ket addaanen iti 313 a personnel.

Impakaammona nga agtultuloy dagiti programa ti NSCC a mangtulong kadagiti mannalon, mangngalap ken babassit a negosiante, kalaksidan kadagiti negosio, hotel, eskuela, isaysayangkatda a multi-million projects.

Impakaammona a nakaipabuloden ti NSCC iti nasurok a P20 Million kadagiti agmulmula iti bawang ken lasona.  Inlawlawagna a dayta a pondo ket naggapu iti Department of Agriculture a naaprobaran babaen ti panagtignay ni Ilocos Sur 1st District Rep. Deogracias Victor Savellano. Impakaammona kadagiti mannalon a tapno makabulodda iti puonan iti nababa nga interes ket nasken ti panagmiembroda nga umuna iti kooperatiba.

Inlawlawagna pay a nasaysayaat ti panagdeposito iti NSCC ngem iti banko gapu ta kalaksidan a makatulong iti panagdur-as ti kasasaad dagiti miembro, ket nangatngato pay ti interesna ngem iti banko. Impaganetgetna a ti miembro ti kooperatiba ket makipagtagikua ken addaan iti dibidendo, ngem maibilang laeng a kliente dagiti adda depositona iti banko.

Inyawisna ti panangsuporta iti kooperatiba a mangtultulong kadagiti kadawyan a tattao a mangpadur-as ti panagbiagda. (Eden Alviar)