Nasulinek a barangay, naikkan iti ambulansia

NAGBUKEL, Ilocos Sur – Maysa a 4×4 nga ambulansia ti naiyawat iti Barangay Cosocos ditoy nga ili idi Nobiembre 12.

Inyawat a mismo dagiti staff ti opisina ni Gov. Luis “Chavit” Singson ti lugan ken ni Barangay Captain ti Cosocos Ester Sape a mausar iti tiempo ti emerhensia babaen ti programa ti gobernador a Community Health Access Vehicle Intended for Brgy. Transportation.

Kiniddaw dagiti bumarangay ti ambulansia idi sinelebraran ni Singson ti panagkasangayna ditoy idi Hunio daytoy a tawen.

Immun-unan a naikkan iti ambulansia ti Gregorio del Pilar, Suyo ken Tagudin.

Kabayatanna, impakaammo ni Sape a dandanin malpas ti proyekto ti padanum iti barangayda a kiniddawda ken ni Singson.

Gapu iti kangato ti lokasion ti barangay, masansan nga agkurang ti suplay ti danum ditoy nangruna iti kalgaw.#