Natagtagbat a babai, naipaautopsia no narames

CERVANTES, Ilocos Sur – Kitkitaen dagiti polis ditoy iti panagimbestigada no adda panagrames a naisayangkat  iti biktima wenno nakiranget ket natagtagbat tapno mailemmeng ti suspek ti kinasiasinona.

Immuneg ti misterio ti kaso ti pannakatagtagbat ni Norma Tallawan y Guisubin, 23, naasawaan, ken residente iti Barangay Malaya ditoy nga ili kalpasan a naireport iti polis ditoy a kinettel ti suspek iti pammapatay ti biagna idi Enero 7.

Segun iti report, imminom iti sabidong ni Reynante Saldaen y Angligen, 45, naasawaan, ken residente iti Barangay Malaya, ditoy met laeng nga ili, ket natakuatan a natayen iti uneg ti balay ti inana sadiay Sitio Biwak ti nasao met laeng a barangay.

Mapapati a nangipatulod ni Saldaen iti text messages iti asawana mainaig iti panangkettelna iti biagna.

Awan ti nailanad iti report no apay a kinettel ni Saldaen ti biagna.

Napan nagnateng ni Tallawan iti bangkagda idi agarup alas 4:00 ti malem ti Enero 6 ket saanen a naggawid.

Idi awan latta ti baketna iti alas 6:00, napan kinita ni Teodoro ti asawana ngem nadatnganna laengen daytoy a daradara ken awanen ti biagna a nakadalutaytay iti bangkagda.

Nagsagrap ti biktima iti tagbat iti ima, rupa ken tengngedna.

Maysa a  panty a mapapati nga aruat ti biktima ti nakita dagiti inbestigador iti asideg ti nakapasaganna.

Iti panagimbestiga dagiti polis, natakuatan nga adda nadumaduma a dunor iti barukong ti suspek, kasta met nga adda mantsa ti dara iti bull capna, sinelas ken diaketna.

Naipaiman iti crime lab ti PRO1 dagiti narekobre dagiti inbestigador nga ebidensia para iti pannakaamirisda.

Naautopsia metten ti bangkay ken naeksamen no naabuso babaen ken ni Dr. Nerino Daciego, medical-legal officer ti PRO1#.