Footer

Natakaw a baka, irik, narekobre

STA. CRUZ, Ilocos Sur – Narekobre met laeng ti maysa a mannalon ti mapukpukaw a tarakenna a tinakaw gayam ti kalugaranna met laeng.

Impulong ni Francisco Soliven, Sr. y Gabuat, 75, residente ti Barangay Mantanas ditoy nga ili a tinakaw ni Renato Jallorina, kalugaranna met laeng, ti babai a baka a tarakenna a nairehistro iti nagan ni Barangay Captain Dominador Cordova nga agbalor iti sumurok-kumurang a P15,000.

Iti panagimbestiga dagiti polis, naammuan nga iti nagbaetan ti 6:00 p.m. ken 7:00 p.m. iti Septiembre 22, 2010, nakita ni Francisco Soliven, Jr. ti suspek iti Barangay Dili a mangiluglugan iti nasao a baka iti maysa a top down a traysikel.

Nagturong da Cordova ken kabsat ti biktima iti yan ti suspek ket pinasublida ti baka. Ngem idi addadan iti dalan a kakuyogda ti suspek a mapan agpakawan ken ni Soliven, Sr., naglibas metten daytoy.

Kabayatanna, napilaan ti suspek iti kaso a panagtakaw idinto a panaglabsing iti anti-fencing law ti naikaso iti naglakuanna iti tinakawna nga irik idi Septiembre 18, 2010 iti Sitio Calaoan, Barangay Tamurong ditoy nga ili.

Naipila ti kaso a theft iti provincial prosecutor’s office maikontra ken ni Jovencio Garcia y Aquino, 21, residente iti nadakamat a lugar gapu iti mapapati a panangtakawna iti dua a kaban nga irik nga agdagsen iti sumurok-kumurang a 94 kilos a kukua ni Randy Rialin idinto a nakasuan met iti violation iti anti-fencing law ni Carmelo Navarro gapu ta nasarakan dagiti sako ti irik iti pagpabaywanna.

Segun iti report, natakuatan ni Rialin a mapukpukaw ti dua a kaban ti irikna ket dinagdagusna ti nagsawar kadagiti aggatgatang iti irik iti lugarda ket nasarakanna dagitoy iti ricemill ni Navarro.

Impudno ni Navarro nga inlako kenkuana ni Garcia dagiti dua a sako ti irik iti P900.#