Natakaw a fighting cocks, nasarakan iti maysa a farm

VIGAN CITY – Sabali pay a grupo dagiti mannanakaw ti natukkol ti durida iti pannakaduktal dagiti polis ditoy ti lugar a nakaipaknian dagiti para tadi a manok kalpasan ti pannakatakawda.

Nagresponde dagiti polis ditoy ket nagturongda iti farm ti maysa nga agnagan iti Agustin Lee, 53, naasawaan, agnegnegosio iti panaglakuan kadagiti para tadi a manok ken residente iti Barangay VI, ditoy siudad kalpasan a nakaawatda iti impormasion idi agarup alas 10:00 ti bigat ti Abril 22 a naipakni iti nadakamat a farm dagiti sumagmamano a natakaw a para tadi a manok.

Kimmuyog iti grupo ni Eustaquio Fuerte y Presto, 76,  natakawan iti para tadi a manok idi rabii ti Abril 15.

Positibo a binigbig ti lakay ti dua kadagiti para tadi a manok nga adda iti farm ni Lee a karaman kadagiti natakaw a manokna.

Iti insayangkatda nga inbestigasion, naduktalan nga inlako ti maysa a Robert Reg, a.k.a. Bogart, residente iti Barangay V, Vigan City nga agdama a residente iti Abra, dagiti manok ken ni Lee.

Maipalagip a sangapulo ket lima a manok ti naireport a natakaw iti maysa a pagtaraknan dagiti  fighting cocks iti Barangay San Julian ditoy idi rabii ti Abril 15.

Naduktalan laengen dagiti agbambantay iti farm ni Fuerte ti pannakatakaw dagiti manok idi mapanda agpakan iti agsapa ti Abril 16.

Mapattapatta nga agbalor iti P50,000.00 dagiti natakaw a manok.

Mapapati a simrek dagiti mannanakaw iti farm babaen ti panangputedda iti barbed wire nga alad iti laud a paset sada rimmuar iti daya a paset babaen ti panangkalay-atda iti alad.

Iti pannakaisurat daytoy, isagsaganan dagiti polis ti maikanatad a kaso maikontra iti suspek.#