Natakaw a motorsiklo, napasubli ti akinkukua

BANTAY, Ilocos Sur – Napasubli ti maysa a baro ti motorsiklona a natakaw idi parbangon ti Nobiembre 2  kalpasan a naaresto ti suspek iti maysa a paggasolinaan ditoy nga ili.

Inaresto dagiti polis ni Troy Corvera y Caravan, 18, baro, taga-Tenement, Taguig, Metro Manila, bayat ti pananggasolinana iti tinakawna a motorsiklo iti Shell Gasoline a masarakan ditoy nga ili.

Sakbayna, nagpulong ni Junel Raquini y Plete, 18, baro, ken residente iti Barangay San Julian ditoy met laeng nga ili, a natakaw ti motorsiklo nga imparkingna iti sanguanan ti pagtaengan ti ulitegna a ni Marvic Ramos a binisitana iti dayta a rabii.

Naammuan a naibbusan iti gasolina ti nasao a lugan isu a napan naggasolina ti suspek nga isu metten ti nakakitaan kenkuana dagiti polis a mangbirbirok iti motorsiklo.

Kabayatanna, naduktalan a naitalaw ti taksi a nagluganan ti maysa a taga-Dirdirig, Burgos, Ilocos Sur ket naipan ti suspek iti police station ti Candon City para iti naing-inget a pannakapalutpotna.

Nagresponde dagiti polis kalpasan a nakaawatda iti tip iti kaadda ti nasao a taksi a naireport nga aganayen a makabulan a mapukpukaw a linuganan ti maysa nga Onofre Almazan, Jr. y dela Cruz, 39, baro, ken residente iti #30 A. Rd 1, Pag-asa, Quezon City ken natibo iti nadakamat a barangay iti Burgos, Ilocos Sur.

Mapapati nga inlibas nga innala ti suspek ti nasao a Toyota Vios a taksi a maris puraw idi Oktubre 8, 2011 ket daytoy ti inusarna a nangbisita iti anakna iti Barangay Tangaoan,Sta. Maria.

Segun iti inbestigasion, mapapati nga agsubli koma ti suspek iti Manila idi Oktubre 29 ngem dimmagas iti ulitegna a ni Froilan Almazan iti Barangay Patpata 2nd, Candon City ket idi apanen iti Manila, makadungdungsa metten isu nga impaigidna ti lugan iti sanguanan ti Juliana Lodging Inn iti Barangay Ayudante ket ditoy a sinitar dagiti nagresponde a polis.#