Natakaw a motorsiklo, nasarakan a naabandona

BANTAY, Ilocos Sur – Nasarakan ti motorsiklo a natakaw iti sango ti maysa nga ospital a naabandona iti national highway ti Barangay Aggay ditoy nga ili idi malem ti Hulio 3.

Intaray dagiti di nabigbig a mannibrong ti Honda XRM motorcycle ni Joseph Aludino y Molina, 22, naasawaan, ken residente iti Barangay Pong-ol, Vigan City nga imparkingna iti sango ti Gabriela Silang General Hospital idi  rabii ti Hulio 2 bayat ti agpatnag a panagbantayna iti kappasngay nga asawana.

Naduktalan laengen ni Aludino nga awanen ti motorsiklona iti kabigatanna.

Sumagmamano a paset ti motorsiklo ti innala dagiti mannibrong a pakairamanan ti plaka daytoy.#