Natakaw a paltog, naisubli

TAGUDIN, Ilocos Sur – Napasubli met laeng ti maysa a polis ditoy ti paltogna kalpasan a boluntario nga insuko ti ina ti maysa a miembro ti fraternity ti nasao nga armas.

Insuko ti ina ni Remy Laranang, miembro ti  Dominic Republic-13 Fraternity, Tagudin Chapter,  iti PNP ditoy ti Cal 9mm Taurus, serial number TZE 21051, nga addaan iti maysa a magasin a naglaon iti 10 a bala idi agalas sais ti bigat ti Nobiembre 10.

Sakbayna, nakaawat ti Tagudin police station iti tip manipud iti maysa nga asset nga adda ikut a paltog ni Dominic Itable, baro, residente iti Barangay Rizal, Tagudin, founder/leader ti nasao a fraternity.

Ngem imbaga dagiti nagannak ni Itable nga adda daytoy iti San Fernando City ket adda iti ikut ni maysa a Remy Laranang ti nasao a paltog.

Mapapati a natakaw ti nasao a paltog idi Agosto 22, 2010.#