Natakaw a motorsiklo, nasarakan a naabandonar

STA. LUCIA, Ilocos Sur – Nasarakan a naabandonar iti sirok ti rangtay sadiay Candon City ti maysa a motorsiklo a naireport iti police station ditoy nga ili a mapukpukaw idi bigat ti Hunio 29.

Naammuan manipud iti polis ditoy, pinakaammuan ida ti polis-Candon City idi agarup 7:00 ti sardam ti dayta met la a petsa a nasarakan dagiti miembro ti BPATS ti Barangay Balingaoan, Candon City ti motorsiklo, maysa a nangisit a Yamaha Mio Soul 1CV2 iti sirok ti Bukong Bridge iti nadakamat a barangay.

Maipalagip idi agarup 10:45 ti bigat ti Hunio 29, inreport ni Ismael Tougan y Valdez, 31, naasawaan, laborer, ken residente ti Barangay Conconig West, Sta. Lucia, iti kapolisan a mapukpukaw ti motorsiklona nga imparkingna a di nakatulbek ti luganna iti kusinada nga awan didingna idi agarup 6:00 ti malem ti Hunio 28.

Segun met ken ni Alejo Peralta y Acosta, 58, siuman a lalaki ni Tougan, ken kabbalayda, nakariing idi agarup 2:00 ti parbangon gapu iti tanaul dagiti aso ket idi nagsukimat,  naduktalanna laengen nga awan ti motorsiklo iti nakaiparkinganna.

Nakasarak dagiti inbestigador iti sinelas iti barangay road iti asideg ti balay da Tougan a masuspetsa a nabati ti di pay nabigbig a tao a nangitaray iti motorsiklo.#