Natakaw a motorsiklo, natuntonan a nakasalda

CAOAYAN, Ilocos Sur – Iti balay ti maysa a dati a barangay captain ditoy nga ili ti nakatuntonan dagiti nagtitipon police elements iti motorsiklo a naireport a natakaw sakbayna.

Narekobre dagiti kameng ti Vigan City police station, Highway Patrol Group (HPG), Bulag, Bantay, ken Caoayan police station, ti Honda XRM 125 a rehistrado ken ni Joyet B. Aniceto ti Barangay San Julian Norte, Vigan City, iti balay ni ex-Barangay Captain Dominic Anicas ti Nansuagao.

Mapapati a tinakaw ken insalda ni Alvin Amistad Lazona, residente iti Barangay Capangpangan, Vigan City ti nasao a lugan.

Inawat dagiti personnel ti HPG ti motorsiklo sada impaima iti Vigan City police para iti umisu a disposision.#