Natakaw a motorsiklo ti news writer, narekobre

STO. DOMINGO, Ilocos Sur – Narekobre dagiti polis ditoy nga ili ti motorsiklo ti news writer ti PTV Ylocos a naireport a mapukpukaw manipud pay idi Nobiembre 3.

Inaresto met dagiti pannakabagi ti linteg ti suspek a nainaganan John Joshua Paruja, 20, naasawaan, residente iti Barangay Camestisuan ditoy met laeng nga ili ken ti saan a nainaganan a kalugaranna agsipud ta maysa a menor de edad.

Maisagsaganan ti kaso a carnapping maikontra kadagiti suspek.

Maipalagip nga inreport ni Kristelle Keith Tubadeza y Ballesta, 24, news writer ti PTV Ylocos, natibo iti Zone 7, Bangued, Abra ken aggigian iti Barangay San Julian, Vigan City, a mapukpukaw ti motorsiklona a Yamaha Mio Sporty nga imparkingna iti Burgos Street, Barangay 1, Vigan City idi agarup 8:00 ti bigat ti nadakamat a petsa sa napan iti pagtrabahuanna.

Mapapati a pinanawan ti biktima a saan a nakatulbek ti motorsiklona.

Idi agarup 5:00 ti malem iti dayta met laeng a petsa, sinublian ni Tubadeza ti motorsiklona ngem awanen daytoy iti nakaiparkinganna.

Kabayatanna, iti pannakaisurat daytoy, di pay nabirokan ti asul a Honda XRM 110 motorcycle a kukua ti maysa a Rizal Cabarloc y Rabena, 38, naasawaan, trabahador ken residente iti Barangay Ayusan, Vigan City a naireport a mapukpukaw idi malem ti Nobiembre 2

Segun ken ni Cabarloc, imparkingna ti motorsiklona idi agarup 5:30 ti malem iti akin-abagatan a linia ti diversion road iti Mira Hills, Barangay VI, ditoy siudad sa napan simmarungkar iti Pampantok Cemetery.

Idi agarup 7:00 ti sardam, sinublian ni Cabarloc ti motorsiklo ngem awanen a nakitana ti lugan iti nangipar-kinganna.

Sinapul ni Cabarloc ti motorsiklona ket idi dina nabirokan, inreportnan iti polis. (Tawid News Team)