Natakaw nga alikamen, natuntonan dagiti polis iti junkshop

SANTA, Ilocos Sur – Agsakit la ketdi ti ulo daytoy junkshop dealer ta malaksid a dina mapasubli ti kuartana, makasuan pay gapu iti pananggatangna iti intukonda kenkuana a natakaw nga alikamen.

Napilaan iti kaso a panagtakaw iti opisina ti provincial prosecutor, Vigan City da Angelo de Peralta, residente iti Barangay Rizal, Santa, ken Guiller Britos, residente iti Barangay Namalangan, Santa, kalpasan a napatalgedan nga isuda ti nagilako iti maya a junkshop dealer idi Hulio 18 kadagiti alikamen a naireport a natakaw iti pagtaengan ni Milagros Obispo sadiay Barangay Namalangan, Santa.

Napilaan met iti kaso a panaglabsing iti Anti-Fencing Law ni Paquito Arzadon y Pablo, 50, residente iti Barangay San Jose, Narvacan gapu ta natuntonan dagiti polis dagiti natakaw nga alikamen iti lakub ti junkshopna.

Idi Hulio 17, nagreport iti polis ni Renato Leones y Antonio, 64, naasawaan, retirado a PNP member ken residente iti Barangay San Pedro, Vigan City a natakawan ti balay ti ikitna a ni Milagros Obispo.

Iti panagimbestiga dagiti polis, napukaw iti balay ni Obispo dagiti sumagmamano nga antigo a muebles a pakaibilangan ti maysa a kayo a kabinet, TV stand, tallo a kayo a tugaw, ken maysa a daan a turn table ti sound system.

Nakastrek dagiti mannanakaw iti balay babaen ti panangikkatda iti jalousie blades ti tawa iti akin-amianan a paset ti balay.

Adda iti Manila ni Obispo agraman dagiti caretaker iti balay idi matakawan.

Iti insayangkat dagiti inbestigador a follow-up investigation, naammuanda a nailako dagiti alikamen iti maysa a junk shop sadiay Barangay San Jose, Narvacan.

Nakikoordinar dagiti polis-Santa iti polis-Narvacan ket nagkukuyogda a napan iti nasao a junkshop nga idi agangay naammuan a kukua ni Arzadon, ket ditoy a natuntonanda dagiti natakaw nga alikamen.

Idi mapalutpot, inannugot ni Arzadon a ginatangna dagiti alikamen nga intukon kenkuana ni Peralta ken Britos.

Ibilang ti kapolisan ditoy a nasolbaren ti kaso iti pannakatuntonda kadagiti natakaw nga alikamen ken iti pannakaipila ti kaso maikontra kadagiti suspek.#