Natalged a panangsarabo ti 2021

GOODBYE 2020. Welcome 2021. Naragsak ken nakappia koma ti isasangbay ti Baro a Tawen kadagiti amin a Pilipino, ken mataginayon a nagasat ken nabunga ti umay a tawen.

Nagpartak a talaga ti panagtulid dagiti aldaw ta napalabas manen ti kaaldawan ti Paskua ket agpakadan ti agdama a tawen ken sarabuenen ti 2021.

Nagadu ti nagsupadian ti panagrambak dagiti Pilipino ita a panawen no maidilig kadagiti naglabas a tawen gapu iti laklak-amen a nakaro a rigat a pinarnuay ti pandemia ti Coronavirus 2019 ken dagiti nagsasaruno a bagyo ken didigra a nangsaplit iti Pilipinas. Makatawenen ti napalabas manipud idi naibutaktak ti kaadda ti saan pay idi a nainaganan a virus a nagtaud sadiay Wuhan City, Hubei Province, China. In-inut a nangsaknap ti virus iti nagduduma a pagilian iti sangalubongan a nangakar ken nangkettel kadagiti nagadu a biag ti tao ken nangdaleb ti ekonomia dagiti nasion.

Kabayatan ti panawen ti pandemia ken krisis ti ekonomia, saan latta a mailaksid dagiti dadduma a Pilipino ti nagbalinen a tradision ken kaugalian a panangsarabo ti Baro a Tawen – ti panagaramat kadagiti nagduduma ti klasena a fireworks, firecrackers ken paltog kas panangpangayed iti daytoy a panawen, ken kadagiti dadduma ket ibilangda a pangbugaw ti malas ti panagbiag.

Kadagiti naglabas a tawen, idi awan pay ti Covid 19, ti panagaramat kadagiti paputok ken paltog ti tinawen a problema a laplapdan ti gobierno gapu ta adda latta dagiti matay ken madangdangran. Uray no nainget ti bilin ni Presidente Rodrigo Duterte ti pannakaipawil ti panagaramat kadagiti napigsa a paputok ken indiscriminate firing iti paltog ket adu latta dagiti naglablabsing. Nagballaagen ni Presidente Duterte a maipakatton kadagiti masungad a tawen ti “total ban” wenno naan-anay a pannakaipawil ti panagaramid ken panagaramat ti paputok iti intero a Pilipinas tapno maliklikan dagiti aksidente. Idi ni Presidente Duterte ti mayor pay laeng ti Davao City ket sadiay ti immuna a naaddaan ti ordinansa a mangipawil ti paputok aginggana ita. Kas alternatibo dagiti agindeg sadiay Davao City ket naang-angay ti “Torotot Festival” kas paset ti panagrambak iti daytoy a panawen. Ngem gapu ti pandemia ket maisardeng pay laeng daytoy a festival.

Nagballaag ti Department of Health a liklikan dagiti umili ti panagaramat ti torotot ita a panangpasangbay ti Baro a Tawen ta posible a ti panagpuyot ken mayakar ti virus no pagsisinublatan ti nagduduma a tao, ken saan a masurot ti social distancing. Adu dagiti alternatibo nga irekrekomenda ti DOH a natalged a panagpataud ti napigsa nga aweng kas ti panagpatokar kadagiti loud speaker ken panagpatit ti tambor, batia ken dadduma pay a banag. Maibalballaag pay a malisian koma ti panagpuor kadagiti goma a pilid ta sabidonganna ti angin ken makaited ti nakaro a sakit ti panaganges ken dakes ti epektona iti tiempo kas ti Climate Change wenno Global Warming. Kadagiti naglabas a tawen, dagiti naala a ladawan iti tangatang ket saanen a malasin ti langa ti Metro Manila gapu ta naulsanen iti napuskol nga asuk gapu kadagiti adu a nasindian a fireworks, firecrackers ken napuoran a goma. Addan dagiti kimmaro dagiti sagsagabaenda a respiratory diseases a gapu ti nakatayan ken nakaospitalanda.

Immandaren da Armed Forces of the Philippines Chief of Staff Gen. Gilbert Gapay, ken Philippine National Police Chief Gen. Debold Sinas ti pannakaplaster ken pannakapirma ti bunganga ti paltog dagiti soldado ken polis a nakadestino kadagiti kampo ken presinto tapno malapdan ti pannakausar dagiti paltog a naka-issue kadakuada. Ngem agridam koma dagiti umili ta addanto latta dagiti nasukir nga agpaputok kadagiti paltogda nangruna ta nagadu dagiti illegal nga armas nga ik-ikutan dagiti unipormado ken sibilian iti nagduduma a lugar iti Pilipinas.

Nakaam-amak ti pannakaiwawa dagiti bala ti paltog a gapun ti nakatayan ken nakadangran dagiti inosente nga umili kadagiti naglabas a tawen. Nagadu dagiti naisaysayangkat nga imbestigasion kadagiti napasamak a pannakapapatay gapu iti indiscriminate firing, ngem awan met ti naidarum ken nadusa tapno adda koma pagmennamennaan dagiti aggandat manen nga agpaputok ti paltog ita a sarabuen ti Baro a Tawen.  

Nabayagen a paset ti tradision ken kultura dagiti Pilipino ti naariwawa a panagpasungad iti Baro a Tawen babaen ti panagusar kadagiti nagduduma a paputok wenno paltog kas panangbugaw ti malas wenno dakes nga espiritu. Natawid daytoy a kaugalian ken pammati kadagiti Insik a nakadiskobre ti pulbora tapno mapapanaw dagiti dakes nga espiritu. Manipud pay iti un-unana a panawen ket ar-aramidenen daytoy a kaugalian dagiti Pilipino no panawen ti Paskua ken pasangbayen ti Baro a Tawen. Adun a kuarta dagiti nasayang gapu iti awan mamaayna a tradision ta nagngina dagiti fireworks, firecrackers ken bala ti paltog.

Mararaem ti Pilipinas kas pagilian dagiti adu a Kristiano, ngem ti panagramat kadagiti paputok ken paltog kas panagbugaw ti kinamalas wenno dakes nga espiritu, ket maikontra iti Pammati ken Kristo ta dayta ket ugali ti kinapagano. Sarabuen koma dagiti Pilipino ti 2021 babaen ti natalged ken nakappia a wagas, ken napasnek a panagkararag iti Dios ta dayta ti kasamayan a mangbugaw ti kinamalas ken dakes nga espiritu. No agaramat iti paputok wenno paltog ket mabalin a makapataud ti aksidente ken kinamalas, imbes a nasayaat a gasat.