Footer

Natalged dagiti DepEd buildings a pinabangon ti DPWH FDEO – Engr. Reynaldo Organo

BANTAY, ILOCOS SUR – Awan ti pagdanagan ti publiko a maipada ti napasamak a trahedia sadiay Natonin, Mountain kabayatan ti iduduprak ni Bagyo Rosita ta natalged dagiti amin a pasdek a pinabangon ti Department of Public Works and Highways First District Engineering Office iti Ilocos Sur, agraman dagiti eskuela ti Department of Education ta nasayaat ti pannakaamiris dagiti nakaipatakderanda ken mayanatup iti standard a kalidad ti pannakaileppasda.

Dayta ti pinasingkedan ni District Engineer Reynaldo Organo ken dagiti nangato nga opisial iti DPWH – FDEO kabayatan ti pannakiuman kenkuana ti Ilocos Sur Integrated Press iti naangay a Kapihan iti Amianan Media Forum.

Inaklon ni Engr. Organo a daksanggasat ti pannakarebba ti uppat a kadsaaran a pasdek ti DPWH sadiay Natonin, Mt. Province a nakatayan dagiti adu a tattao gapu ta nagaburan kadagiti dadakkel a bato manipud iti kaabayna a nangato a bantay a ginubuay ti ilulukneng ti daga a pinataud ti napigsa ken napaut a tudo nga inyeg ni Bagyo Rosita. Inlawlawagna a ti pannakarebba ti DPWH building ket saan a gapu iti kalidad ti pasdek ngem gapu iti kaadu ken kadagsen dagiti bato a nanggabur. Inaklonna nga adda nagkurangan ti DPWH sadiay Mt. Province sakbay ti pannakabangon ti narebba a pasdek ta uray no adda clearance ti Department of Environment and Natural Resources – Mines and Geo-science Bureau, saanda a nangala kadagiti naan-anay a kasapulan a clearance manipud iti Department of Science and Technology – Philippine Institute of Volcanology tapno napasingkedan ti kinalagda ti aglawlaw ti nabangon a pasdek.

Pinasingkedan ti District Engineer a no maipapan dagiti nangato a pasdek a pinabangon ti DPWH nga usaren dagiti eskuela ti DepEd ket nasayaat ti pannakaamiris dagiti lugar a nakaipatakderanda. Inlawlawagna a natalged ti multi-storey DepEd building a nabangon sadiay San Juan National High School uray no adda iti turod ta nalagda ti nakaipatakderanna ken awan ti kaabayna a nangato a bantay a margaay ken manggabur no rumsua ti dakes a panawen, kas ti napasamak sadiay Natonin. Mt. Provice.

Impakaammo pay ni Engr. Organo ti pannakaileppas dagiti amin nga school buildings sakbay dagiti naituding a petsa tapno adda naan-anay nga usaren dagiti eskuela. Impalgakna a nakaprograman ti pannakatarimaan dagiti Gabaldon building kadagiti pagadalan iti Umuna a Distrito ti Ilocos Sur tapno mamantiner dagitoy a pasdek a paset ti pakasaritaan ti panagdur-as ti edukasion dagiti umili.

Impakaammona pay ti District Engineer nga agtultuloy ti pannakapalawa dagiti rangtay ken paset ti national road iti masakupanda kas paset ti Build Build Program ti gobierno. Inlawlawagna a kadagiti sentro ti ili ket saan pay a nakaprograma ti pannakapalawa dagiti rangtay ken kalsada gapu ta adu dagiti madalapus a balay ken pasdek, ngem manamnama a maisarunodanton iti masakbayan a tawen.

Inrakurak pay ni Engr. Organo ti agtultuloy ken phase-by-phase a pannakaaramid ti Bantay – San Ildefonso bypass road a no maileppas ket padarasenna ti panagdaliasat iti National Highway. Impakaammo met a narugianen ti plano a pannakabangon ti coastal road manipud Mindoro Airport iti Vigan City agingga sadiay Salomague Port iti Cabugao, ngem adda dagiti tubeng iti nadaras a pannakaituloyna nangruna dagiti daga a madalapus a kukua dagiti pribado a tattao.

Pinalagipan pay ti Districr Engineer dagiti agbilbilag iti irik ken mais iti igid ti National Highway a mailabsing dayta iti linteg. Inaklonna nga awan ti police power ti DPWH ngem iti pannakaited ti deputation order kadagiti kameng ti Philippine National Police iti pannakawaknit dagiti National Highway iti traffic obstraction, ket bimmasiten dagiti agbilbilag iti irik ken mais iti igid ti kalsada. Impaganetgetna a dagiti kalsada ket nabangon a pagnaan, saan a pagbilagan, ket kiniddawna iti publiko a surotenda koma ti linteg tapno maliklikan dagiti aksidente iti kalsada.

Pinasingkedan met ni Assistant District Engineer Reynaldo Ablog, ken dagiti kaduana nga inhiniero ti agtultuloy a napudno a panangipaay ti DPWH iti umno a serbisio iti pannakabangon ken pannakamantiner dagiti proyekto ti imprastraktura ti gobierno para ti sapasap a pagimbagan dagiti umili. Kiniddawda ti kooperasion ken pannakaawat ti publiko iti pannakataktakda kabayatan ti pannakaisayangkat dagiti proyekto ta inton malpasda ket makaipaay met ti sapasap a pagsayaatan. (Eden Alviar)