Banner News: Natalged dagiti natayag a poste ti ISECO – General Manager | Tawid News Magazine - Weekly Ilocos News 📰

Natalged dagiti natayag a poste ti ISECO – General Manager

VIGAN CITY — Awan ti pagdanagan dagiti umili nga adda dagiti balayda kadagiti asideg dagiti maimunmontar a natayag a poste ti koriente iti igid ti National Highway iti Ilocos Sur gapu ta nagdalan dagitoy iti nainget a safety standard a kabaelanda a sarangten uray dagiti napigsa a bagyo.

Dayta ti pinasingkedan ni Engr. Egdon Sabio, General Manager ti Ilocos Sur Electric Cooperative (ISECO), kabayatan ti naangay a press conference dagiti opisial ti kooperatiba mainaig iti 41st Annual General Membership Assembly.

Naangay ti press conference iti Hotel ni Among iti daytoy a siudad idi Disiembre 7, 2019. Nagatender iti press conference dagiti miembro ti Board of Directors nga indauluan ni Atty. Gloria Corrales, BOD President ken dadduma pay a nangato nga opisial ti ISECO. Sinungbatanda dagiti adu a saludsod dagiti kameng ti media maipapan ti pakaseknan ti electric cooperative ken dagiti members-consumers.

Impasingked ni Engr. Sabio a dagiti agdama a natayag a konkreto a poste a paikakonektaran dagiti primary lines ti ISECO ket natibkerda ket saanda a basta-basta a matumba ta naikalida a nauneg ken naikapet dagiti safety measures tapno maliklikan ti aksidente. Impaganetgetna nga awan ti rumbeng a pagdanagan dagiti agnaed kadagiti balay nga adda iti asideg dagiti natayag ken konkreto a poste ta automatic nga ag-shutdown wenno agawan ti koriente no agtuang wenno addan napigsa nga angin.

Inlawlawagna pay nga awan ti napagtutulagan dagiti miembro ti BOD no agbayad ti ISECO kadagiti agtagikua kadagiti pribado a lote a nakaimontaran dagiti poste ti koriente. Impeksana ti tarigagayna a saan koman a maobligar ti ISECO nga agbayad iti pannakaipatakder dagiti poste ti koriente kadagiti pribado a daga ta tulong koman ti akinkukua iti operasion ti electric cooperative uray ket para met iti sapasap a pagimbagan ti kooperatiba ken dagiti miembro.

Impakaammo ni Engr. Sabio nga agtultuloy iti panagiyakarda kadagiti poste ti koriente iti igid ti National Highway mainaig iti road-widening project ti Department of Public Works and Highways. Impakaammona a dagiti saan pay a mayakar a poste ket kukua dagiti telephone companies.

Impanakkel pay ti General Manager nga agtultuloy ti panagadur-as ti ISECO ket maysa kadagiti kadakkelan iti assets nga electric cooperative iti intero a Pilipinas a dumanonen iti P1.188 billion, ken maysa kadagiti ginaraduan iti “AAA electric cooperative” ti National Electrification Administrasion. Kiniddawna ti agtultuloy a suporta dagiti members-consumers tapno ad-adda pay nga agprogreso.

Linawlawagan met ni Atty. Corrales dagiti isyu mainaig iti pannakayalud-od wenno extension ti termino dagiti miembro ti BOD. Impakaammona a na-extend ti termino dagiti ag-last term ken over-age a miembro gapu iti direktiba nga imparuar ti NEA.

Inlawlawagna a saan a naangay ti eleksion ti director iti nabakante a distrito kas mayataday met laeng iti direktiba ti NEA a maisurot iti tawen a pannakaangay iti eleksion iti gobierno. Impakaammona a maangay ti eleksion dagiti bakante a distrito agingga inton Marso 20, 2020.

Inlawlawag pay ni Atty. Corrales a saan a nasayaat nga aggigiddan a maelektaran wenno mabutosan dagiti kameng iti BOD tapno mabalanse ti bilang dagiti oldtimers ken newcomers a director tapno naannayas ti panagakemda kadagiti annongenda. Impakaammona a nasken adda latta dagiti mabati a beterano a director a mangbayabay kadagiti kabarbaro a kameng ti BOD ta kasapulanda pay iti napaut a panawen nga agsursuro kadagiti annongenda.

Iti singasing a maitulad koma iti Senado ti wagas iti eleksion dagiti BOD a mabingay ti kadagupanda ket agsinnublat ti pannakaisayangkat ti eleksion tapno maliklikanen dagiti pannaka-extend ti termino dagiti direktor, inaklon ni Atty. Corrales a mabalin ken nasayaat dayta a singasing ngem kasapulan iti pannakaidatag ken pannakaaprobarna iti Membership Assembly.

 Naangay ti 41st AGMA ti ISECO sadiay Sta. Cruz Sports Complex, Sta. Cruz Ilocos Sur idi Nobiembre 30, 2019 para kadagiti miembro a taga-2nd District. Naangay met ti AGMA para kadagiti miembro a taga-1st District sadiay Sto. Domingo People’s Coliseum, Sto. Domingo, Ilocos Sur. ●