Natalna ti Ilocos Sur, pammasingked ni Gov. Singson; Muslim leaders, kondenarenda ti terorismo

VIGAN CITY – Iti sango ti naglabas a pangta ti terorismo iti Northern Luzon, pinasingkedan ni Ilocos Sur Governor Ryan Luis Singson nga ar-aramiden ti Provincial Government ken dagiti kameng ti Philippine National Police ken 81st Infantry Battalion ti Philippine Army ti kabaelanda tapno agtalinaed a natalna ken nakappia iti sibubukel a probinsia.

Inaramid ni Gov. Singson ti pammasingkedna iti seguridad dagiti umili iti sibubukel nga Ilocos Sur kabayatan ti naangay a press conference sadiay Provincial Capitol idi malem ti Agosto 16, 2019.

Kadua ni Gov. Singson a dimmatag kadagiti kameng ti media dagiti imam ken lider dagiti Muslim communities kadagiti nagduduma nga ili ken siudad iti Ilocos Sur.

Iti panagsarita ni Gov. Singson, impeksana ti epekto ti nagwaras iti social media a memo alert manipud iti Armed Forces of the Philippines Northern Luzon Command mainaig iti intelligence report a possible a pannakaisayangkat iti terorismo kadagiti ayan ti negosio ken simbaan iti Amianan a Luzon, pakairamanan ti Vigan City iti Ilocos Sur. Impakaammona a kas epekto ti nagwaras a memo alert ket bimmassit dagiti napan kadagiti simbaan, pagtagilakuan ken dadduma pay a matatao a lugar iti naglabas a lawas.

Impasingked ni Gov. Singson ti agtultuloy a panagsiput ken panagbantay dagiti polis ken military tapno agtalinaed a natalged ken nakappia ti Ilocos Sur. Kiniddawna met kadagiti umili iti agtultuloy a panagridam ken panag-report-da iti autoridad no adda dagiti mapagduduaan a dakes a mapaliiwda a posible a makaipaay it peggad. Kiniddawna pay kadagiti agiwarwaras iti buteng iti social media nga isardengdan dayta nga aramidda tapno agsublin iti normal a panagbiag dagiti agnaed iti Northern Luzon.

Iti met panagsarita ni Mr. Osama Mustafa, lider ti Muslim community iti ili ti Bantay, Ilocos Sur a nagpaay nga spokesman dagiti 15 a Muslim leaders ken imam manipud kadagiti nagduduma nga ili ken siudad, impeksana ti saanda a panangkanunong ken panangkondenarda iti aniaman a terorismo a mapasamak iti pagilian ken iti lubong.

Impasagepsepna nga isuda a Muslim nga agnanaeden iti Ilocos Sur ket saandanto a pulos a kanunongan ti kinadamsak nga isayangkat dagiti kapamatianda. Inlawlawagna a saan a mayanatup iti pammati nga Islam ti terorismo. Impasingkedna ti suporta dagiti amin a Muslim communities iti Ilocos Sur iti pannakikaysada iti gobierno para iti natalna a probinsia.

Inlawlawagna nga isuda a Muslim nga agnaed iti Ilocos Sur ket pinanawanda dagiti nariribuk a probinsiada ta kayatda iti nakappia a panagbiag, ken addada ditoy a probinsia tapno agnegosioda. Impakaammona nga iti panagraira iti social media ti memo alert iti terorismo ket dandani awanen ti malakuanda. Impalgakna pay a dagiti annakda nga agbasbasa kadagiti nagduduma a pagadalan iti Ilocos Sur ket naglak-amdam iti “bullying” ken pannakasursuronda kas terorista.

Impasingkedna ken dagiti kakaduana a saanda a pulos nga ipalubos nga adda padada a Muslim a mangiwayat iti terorismo iti Ilocos Sur ta nariknadan ti panangipateg ti lokal a gobierno ken dagiti umili kadakuada iti laksid ti kinasangsangaili ken naiduma ti kultura ken pammatida.

Nagkarida dagiti Muslim leaders iti Ilocos Sur nga isuda a mismo ti mangipulong iti autoridad no adda dagiti sumangbay kadagiti komunidadda a mapagduduaan ti tignayda. Impakaammoda pay iti kiddawda iti Provincial Government para iti pannakabukel iti Office of Muslim Affairs iti Provincial Capitol a mangtaming iti pakaseknanda.

Naammuan iti presscon nga addan nasurok a 2,000 dagiti Muslim iti Ilocos Sur a naiwaras kadagiti nagduduma nga ili ken siudad iti probinsia, ken nasurok a 1,000 kadakuada dagiti nataengan, ken addan siam a mosque dagiti Muslim ken sumagmamano a sub-mosque. Nakiddaw kadagiti taga-Ilocos Sur ti agtultuloy a nasayaat a panaglalangen dagiti agindeg Kristiano man wenno Muslim babaen ti panangibiag ti napudno a pammati iti bigbigenda a Dios. ●