Natarnaw latta ni lagip

Agraraay ti tinagapulotan nga isemko ta nasuroken a duapulo ket uppat a tawen daytoy a daniw. Nabayag metten a nakapempen. Nagmaris newsprint ti sigud a nakapudpudaw a kopun ban a nakaimakiniliaanna. Nagmaris Milo ti sigud nga Alaska a papel. Kastan kapaut ti naglabasanna a tawen!

Makapaisem a talaga ta no intay amirisen a nalaing dagiti binatog ti daniw, lukagenna met ti napalabas.  Amintayo ket pasaheros ti M/V Don Juan.

Natarnaw latta ni lagip, lalo no subliak no apay a naisar-ongak iti lubong a saanko a ninamnama, saanko a kiniddaw ken lalo a saanko nga inarapaap. Natarnaw ni lagip ta kayarigan dayta a daniw ti nakalawlawa a ridaw a nangpastrek kaniak tapno agbasakbasakak iti saanko a lubong. Iti ababa a pannao, naisar-ongak laeng wenno aksidente a simrekak iti lubong a diak inarapaap.

Kinopiak ti daniw a kastan ti pannakaisuratna. Diay pannakaisuratna idi iti makinilia, isu lattan. Ania ti kayat a sawen ti daniw? Saan a daydiay ibagbagana ti talaga a kayatna a sawen. Adda sabali ken central idea ti daniw. Adda ngamin daniw a daydiay ibagbagana ket saan nga isu ti direkta a kaipapananna. Naidalan iti pangngarig wenno pangiyarigan iti kayatna a sawen. Ta kasta ngamin dagiti dadduma a daniw. Saanda nga ibaga a diretso ti kayatda nga ibaga no di iyarigda laeng. Uray met ti gagangay a panagpapatang, maisapit daydiay panangiyarig iti kayat nga ibaga. Saanda a maisawang a direkta no di iyarig laeng.

Adda tallo a nadakamat iti daniw: siak ken dagiti pasaheros, ti piloto, ken ti  M/V Don Juan. No amirisen a nalaing, ti pagiliantayo ti dakdakamaten ti M/V Don Juan. Dagiti mismo nga umili ti “Siak Ken Dagiti Pasaheros” ket ti piloto ti mangidaulo ti pagilian. Naaramid daytoy a daniw iti panawen a kaaduan dagiti dandaniw Iluko ket dagiti pay laeng nalaka a maawatan wenno direkta ti dakdakamatenda.

Saan a daytoy ti kaunaan a sinurat ti author a daniw ta nagputputar met idin ngem saanna impaipablaak (siguro gapu iti rason a dina ammo ti agmakinilia, he-he!) ta umanayen nga inyebkasna laeng ti marikriknana, kapanunotanna, sirmatana, ken dadduma pay. Naisurat dagita iti short hand.

Daytoy ti kaunaan a daniwna a naikontes ken naimakinilia.  Saan a mannaniw wenno mannurat ti author. Pinadasna laeng ti nagsurat a tinugketugkelanna nga in-inut ti makinilia a nangpalabasanna iti oras kalpasan a nagbasabasa iti nagduduma a komiks, magasin ken kangrunaanna, ti Bannawag. Imbusonna ti kopia, kalpasanna, kasla awan aniaman kenkuana no adda man banagenna wenno awan. Ti importante, naiyebkas ti author ti riknana, kapanunotanna, paliiw, panirigan, ken dadduma pay.

Naklaat laengen ti author idi nakaawat iti surat a nangabak  daytoy a daniwna iti maikalima a puesto. Nangabak? Kasano a napasamak? Saan a makaidna ti author. Kasla di nakapappapati ngem pudno.

Ket tapno penkenna no pudno, immatendar iti GUMIL Convention 1986 sadiay Suso Beach, Sta. Maria, Ilocos Sur. Inawatna ti premiona a P150.00 ken ni Apo Romulo G. Basuel . Dakkel a gatad daytan idi a panawen kunam sa, ngem saan nga importante iti author ti gatad ti premio no di ti naawatna a surat a nakailanadan a nangabak ken nanglukat ti ridaw a makigamulo iti GUMIL ken agbalin a premiado a mannurat.

Kangrunaanna, daydi a panangabak ti author ti nangited iti panagbalbaliw iti biagna gapu kadagiti panirigan a nasken a saluadanna. Nailamina iti udi dayta a surat ti makagutugot-rikna: I am looking forward in the future that you will be participating more contests in the professional category. And, of course, I wish you luck in your writing undertakings.

Pinirmaan ni Amado I. Yoro, Founder & Chairman, Dakilang Ugat Awards. Ti nasao a pasalip ket babaen ti pannakitinnulong ti GUMIL Sinait babaen ti panangidaulo ni Romulo G. Basuel.

Ita, addaanen ti author iti sumagmamano nga awards a pakaibilangan ti 1st Prize iti Paligsahan sa Tula 1998 ng Homelife Family Magasin ken 1st Prize Palanca Awards 2000 iti Ilokano category.

Natarnaw latta ti lagip. Iti agdama, siak daytoyen…ti manglaglagip.#