Natiliw nga agtatakaw, di masampaan iti kaso ta di aginteres dagiti natakawan: Vigan City COP

VIGAN CITY – Linagidaw ti hepe ti polis ditoy ti panagpukaw ti interes dagiti biktima ti panagtakaw ditoy siudad nga agipila iti kaso apaman a napasublida ti natakaw kadakuada.

Kinuna ni Police Supt. Elpidio Nartates nga iti kallabes, adda dagiti natiltiliwda a mannipdut wenno mannanakaw ngem saanda a nakasuan gapu ta saanen nga interesado dagiti biktima nga agdarum kalpasan a napasublida dagiti kuarta wenno gamengda a natakaw.

“Awan metten ti basehanmi nga agisampa iti kaso kontra kaniada (mannipdut) agsipud ta mismo a dagiti natakawan ket dida met agipilan iti kaso,” kinunana ni Nartates idinto a indawatna kadagiti mabiktima iti panagtakaw nga ituloyda latta ti agipila iti kaso tapno adda pagmennaan dagiti mannibrong nga agisayangkat iti dakes a panggepda.

“Ti la pagladladingitanmi, no kasapulanda (biktima) ti tulong, polis ti madakamatda ngem no adda matiliw, saanda metten nga aginteres nga agisampa iti kaso no napasublidan ti item a natakaw kadakuada,” kinuna ni Nartates.

Linagidaw pay ni Nartates ti kaawan ti ordinansa ditoy siudad a mangibilin kadagiti pasdek-negosio a mangipasdek iti security measures iti pagtagilakuanda.

Nupay kasta, impalgak ti hepe nga addan dagiti negosiante a nagipasdek iti bukodda a CCTV iti pasdek-negosioda a saandan nga inuray ti pannakaipasa ti ordinansa iti sangguniang panlungsod.

“Sapay koma ta agbalin a linteg a maaddaan dagiti major business establishments iti security measures sakbay a mapabaroda ti business permitda,” kinuna ni Nartates.

Impalgak ni Nartates nga addan dagiti CCTV camera a naipasdek iti sumagmamano a matatao a lugar iti siudad a kabaelanda nga irekord dagiti mapaspasamak iti pito nga aldaw.#