National Cultural Treasure, nakadulin iti Nueva Segovia Archives iti Ilocos Sur

VIGAN CITY – Sabali manen a maipanakkel dagiti umili ken agindeg iti Ilocos Sur ken iti intero a Kailokuan ti panangideklarar ti National Archives of the Philippines kas maysa a National Cultural Treasure dagiti daan a dokumento manipud pay idi 1645 a nakadulin iti Arkidiosesis ti Nueva Segovia Archives.

Naangay ti pormal a deklarasion ken pannakalukais ti marker para kadagiti Spanish Period Records ti Arkidiosesis ti Nueva Segovia Archives kas National Cultural Treasute iti pormal a seremonia ken programa a naangay iti kadaanan ken napnuan-kaipapanan a Palacio Arzobispado de Nueva Segovia, iti daytoy a siudad idi bigat ti Disiembre 6, 2018.

Indauluan ni Nueva Segovia Archbishop Marlo M. Peralta ken NAP Executive Director Victorino Mapa Manalo ti pannakapirma ti Memorandum of Agreement iti nagbaetan dagiti dua nga institusion. Kalpasanna, naisayangkat ti “unveiling ti marker” babaen met kada Abp. Peralta, Dir. Manalo, ken da 1st District Rep. Deogracias Victor Savellano, Vice Gov. Jeremias Singson, ken dadduma pay nga opisial. Inatenderan daytoy a pasken dagiti agpapaay iti Simbaan ken gobierno.

Iti mensahe ni Abp. Peralta, pnagyamanna dagiti ahensia ti gobierno nangruna ti NAP iti pannakabigbig dagiti records iti archives ti Nueva Segovia tapno masaluadan dagiti gameng a maibilangen kas National Cultural Treasure. Impaganetgetna ti kinapateg ti naglabas kas silaw a mangiturong iti nalawag a panagdaliasat iti masakbayan para kadagiti sumaruno a henerasion.

“These valuable old documents will make us remember our past to inspire us, let us preserve them for future generations,” kinuna ni Abp. Peralta iti paset ti homiliana.

Iti panagsarita ni NAP Executive Director Manalo, inlawlawagna ti kaipapanan ken kinapateg ti pannakaideklar dagiti nakadadaanen a dokumento a nakadulin iti Nueva Segovia Archives kas paset ti namaris a pakasaritaan ken nabaknang a kultura ti Pilipinas iti benneg ti relihion. Impalagipna a ti Nueva Segovia, ti maysa kadagiti uppat a diosesis nga immuna a nabangon iti Pilipinas, a timmubuan ti Katolisismo iti Amianan a Luzon. Impakaammona a ti Palacio Arzobispado iti Nueva Segovia ket laengen ti nabati kadagiti amin a naipatakder nga Arzobispado idi panawen dagiti Kastila.

Impalgak ni Manalo a dagiti dokumento iti Nueva Segovia Archives ket maikatlo kadagiti immunan a naideklarar a National Cultural Treasure, mainayon kadagiti dua nga immuna dagiti dokumento iti University of Santo Tomas Archives, ken iti dagiti koleksion iti NAP.

Impakaammona a mairaman kadagiti daan a dokumento iti Nueva Segovia Archives ket nangrugi pay idi 1645, mairaman dagiti dokumento mainaig kadagiti Padre Jose Burgos, Gabriela Silang ken kakaduana a martir, Leona Florentino, Obispo Alfredo Verzosa, ken dadduma pay a prominente a personalidad iti probinsia.

Inlawlawagna a dagiti dokumento iti Nueva Segovia Archives ket maibilangdan a kas kapateg ti Jose Rizal Monument, dagiti simbaan iti ili ti Santa Maria (Ilocos Sur) ken Paoay (Ilocos Norte), ken dadduma pay a National Cultural Treasures iti nagduduma a paset ti Pilipinas. Impakaammona a madaman ti proseso ti pannakaideklararto ti simbaan iti ili ti San Vicente, Ilocos Sur ken Basi Revolt painting kas National Cultural Treasure.

Iti met panagsarita da Cong Savellano, Vice Gov. Jeremias Singson, ken Vigan City Councilor Francisco Ranchez III a nangirepresentar ken ni Mayor Juan Carlo Medina, nagkaykaysada a nagyaman iti Nueva Segovia ken NAP iti pannakaideklarar ti Archives a pakaidulinan dagiti maibilang a gameng ti probinsia iti benneg ti relihion. Impasingkedda ti agtultuloy a suportada kadagiti umasping a gannuat para ti pannakasaluad ti kultura, tradision ken kaugalian dagiti umili iti Ilocos Sur para iti sumaruno a henerasion. (Eden Alviar)