Pannakaideklarar a national holiday ti anibersario ti ‘Victory in Bessang Pass’, mayusuat

BETERANO ITI BESSANG PASS

VIGAN CITY – Pannakaideklarar kas national holiday iti intero a Pilipinas ti tinawen nga anibersario ti panangparmek dagiti nagtipon a puersa dagiti Pilipino ken Amerikano kadagiti Japanese Imperial Forces sadiay Bessang Pass, Cervantes, Ilocos Sur tapno mataginayon iti lagip ken maisaknap ti pannakaammo dagiti Pilipino ti kaipapanan dayta a nadara a gubat a nangiturong ti isusuko dagiti Hapon.

Dayta ti impakaammo ni Vice Gov. Jeremias Singson kabayatan ti pannakiuman kenkuana dagiti kameng ti Ilocos Sur Integrated Press sakbay ti anibersario ti Battle of Bessang Pass.

“No naideklarar a national holiday ti tinawen nga anibersario ti sigud a Fall of Bataan nga isusuko dagiti Pilipino ken Amerikano kadagiti Hapon, rumbeng a maikkan met iti kasta nga importansia ti panangparmek dagiti Pilipino ken Amerikano kadagiti Hapon a nakagapuan ti panagsurenderda tapno maisaknap ti kinamaingel ken kinabannuar dagiti kadaraantayo kabayatan ti Maikadua a Gubat iti Lubong,” kinuna ni Vice Gov. Singson iti panangilawlawagna iti kalikagumda iti Provincial Board a mangkiddaw kadagiti maseknan nga ahensia para ti pannakaideklarar a national holiday ti tinawen nga anibersario ti panagballigi dagiti Pilipino iti gubat sadiay Bessang Pass.

Inlawlawag ti Vice Governor a naindaklan ti paset ti Bessang Pass iti pakasaritaan ti Ilocos Sur ken iti intero a Pilipinas ta iti panagballigi dagiti puersa a Pilipino ken Amerikano iti dayta a napaut ken nadara a gubat ket isu ti nakaigapuan a simmuko dagiti puersa ti Hapon a nangigibus ti gubat iti Pilipinas.

Impaganetgetna a nasken pay ti agtultuloy a pannakapadur-as ken pannakamantiner ti Bessang Pass a mangipalagip ti kinatured ken kinamaingel dagiti nangibuis ti biagna, ket agbalin a maysa kadagiti tourist destination iti Ilocos Sur a makatulong iti idudur-as ti turismo iti probinsia.

Kabayatan ti maika-74 nga anibersario ti panagballigi iti gubat iti Bessang Pass sadiay Brgy. Malaya, Cervantes idi Hunio 14, 2019, inlagip dagiti opisial ti gobierno kangrunaanna ti local government ti Cervantes, dagiti kameng ti Philippine National Police ken dagiti beterano iti gubat ti naindaklan nga aldaw babaen ti Nasantuan a Misa, flag raising ceremony ken pannakaidaton dagiti sabong iti monumento dagiti bannuar ken napasag iti Bessang Pass.

Iti dayta a pasken, impeksa met ni Mayor Pablito Benjamin Maggay ti tarigagay ti lokal a gobierno a pannakaisaknap ti pannakayadal ti pakasaritaan ti gubat iti Bessang Pass. Impalgakna pay ti suporta ken tarigagayda a pannakaideklarar koma kas national holiday, ti tunggal anibersario ti Battle of Bessang Pass tapno maikkan ti naun-uneg a kaipapanan dayta nga aldaw ti kinamaingel, kinatured ken panagballigi dagiti Pilipino ken Amerikano a nangparmek kadagiti kabusor a Hapon a nangitunda ti isusukoda ken pannakaigibus ti gubat iti Pilipinas.

Iti pannakiuman ti media kadagiti sumagmamano nga umili iti Cervantes, nagkaykaysada a kumanunong iti pannakaideklarar a national holiday ti panagballigi dagiti Pilipino ken Amerikano iti Bessang Pass a nangparmek kadagiti kabusor a Hapon tapno maitandudo iti pakasaritaan ti kinamaingel dagiti natay iti dayta a paset ti Ilocos Sur ken mairakurak ken mataginayon kadagiti Pilipino ti nagbalin a paset ti Bessang Pass iti pannakaigibus ti gubat ken pannakagun-od ti kappia iti Pilipinas kalpasan ti panagturay dagiti Hapon iti pagilian iti sumagmamano a tawen.

Maibasar iti pakasaritaan, ti gubat iti Bessang Pass kadagiti kangrunaan a gubat iti Pilipinas kabayatan ti Maikadua a Gubat iti Lubong a nakaibuisan iti adu a dara ken nasurok a 3,500 a biag. Nagpaut daytoy manipud Enero 9 agingga idi Hunio 15, 1945. Ti Bessang Pass ti dalan kadagiti kabambantayan iti Cordillera a nagbalin a sarikedked dagiti Japanese Imperial Forces nga indauluan ni Gen. Tomoyuki Yamashita, ti mabigbig a “Tiger of Malaya” ken “Conqueror of Singapore.” Paset dayta ti triangulo a depensa ni General Yamashita iti Amianan a Luzon kadagiti Allied Forces: Bessang Pass, Balete Pass, ken Villaverde Trail. Nagballigi ti puersa United States Army Forces in the Philippines – Northern Luzon (USAFP-NL) a nangparmek kadagiti Hapon idi Hunio 14, 1945 a nangitunda iti pannakasunson ken pannakarikus dagiti puersa ni Gen. Yamashita iti Cordillera aginggana a simmuko idi Septiembre 1945 a gapu ti pannakaigibus ti gubat iti Pilipinas.