Naun-uneg nga inbestigasion iti Sidaoen shooting, imbilin ti PNP provincial director

BANTAY, Ilocos Sur – Imbilin ti provincial director ti Police Provincial Office ditoy iti hepe ti polis ti Sta. Cruz ti panangiwayatna iti naun-uneg nga inbestigasion mainaig iti pannakapapatay ti maysa a trabahador ti electric equipment sadiay Barangay Sidaoen, ti nasao nga ili idi rabii ti Disiembre 16.

Iti inisial nga inbestigasion dagiti polis-Sta. Cruz, napapatay ni Diony Gabayne y Angala, 41, naasawaan, helper ti electric equipment ti Lights Arts Company a nakabase sadiay Manila ken residente iti nasao a barangay, idi agarup 3:35 ti parbangon  ti nadakamat a petsa  babaen dagiti di nabigbig a tattao a mapapati a nangur-uray iti isasangpetna.

Kadisdissaag ti biktima iti Candon Bus Line ket bayat ti pannagnana iti national highway, nalabsanna ti dua a tattao nga agtugtugaw iti waiting shed idinto a nakaparking ti motorsikloda iti akindaya nga abaga ti kalsada.

Mapapati a sinurot dagiti dua a suspek ni Gabayne, sa kellaat a pinasanguan a pinaltogan ti maysa kadakuada a nagaruat iti patig a diaket a nakapuntaan ti bibig ti biktima sa rimmuar iti makannawan a pangana.

Mapapati a kinuna ti maysa kadagiti suspek: “Tiraem diay ulo na Pare tapno sigurado!”

Ngem iti di pay ammo a nakagapu, saan nga intuloy dagiti suspek nga uloyan ti biktima ket sinaltaanda ti Yamaha STX motorcycle a maris nalabaga sada naglibas iti saan nga ammo a direksion.

Naitaray ti biktima iti Sta. Lucia District Hospital sa naiyalis iti Candon General Hospital, Candon City para iti ad-adda pay a pannakatamingna.

Saan pay nga ammo no ania a klase ti paltog ti nausar agsipud ta awan ti nasarakan a kapsula iti nakapasamakan ti pammaltog.

Agtultuloy ti panagimbestiga dagiti polis no ania ti motibo ti pannakagandat ti biag ni Gabayne.#