Nayon a RA 7171 fund share dagiti non-virginia tobacco producing LGUs, makiddaw

ERRATUM: Santa Mayor Jesus “Popoy” Bueno Jr. was mistakenly given the surname of “Bello” in the news article below. TNM apologizes for the mistake.

SANTA, Ilocos Sur — “Ilungalongko ti pannakakiddaw iti Provincial Government ti Ilocos Sur ti pannakanayon ti bingay a mayal-alokar iti ili ti Santa, ken dagiti dadduma pay a local government units a bassit ti alokasionna manipud iti Virginia Tobacco Excise Tax Fund kas sagudayen ti Republic Act No. 7171 tapno adda nayon a pondo a gastosen dagiti lokal a gobierno a pangpadur-as dagiti ili ken siudad a saan nga agmulmula wenno bassit ti produktoda a tabako a birhinia.”

Dayta ti inrakurak ni Santa Mayor Jesus “Popoy” Bueno Jr. iti pannakiuman kenkuana dagiti kameng ti Ilocos Sur Integrated Press.

Inlawlawag ti Mayor nga adda innem nga LGU iti Ilocos Sur a saan nga agmulmula iti tabako a birhinia gapu ta saan a tumutop ti klase ti dagada a makapataud ti nasayaat a kalidad ti tabako. Impakaammona a kalaksidan iti ili a Santa ket saan met nga agmulmula iti tabako a birhinia ti Vigan City, ken dagiti ili ti Caoayan, Bantay, Santa Catalina, San Vicente ken San Ildefonso. Impakaammona pay nga adda dagiti sumagmamano nga ili ti agmulmula iti tabako a birhinia ngem limitado laeng dagiti produktoda gapu ti kailet dagiti nasayaat a pagmulaanda kas ti ili a San Esteban.

Inlawlawag ni Mayor Bueno a sagudayen ti R.A. 7171 wenno An Act to Promote the Development of the Farmers in the Tobacco Producing Provinces a pagtataudan ti tinawen a binilion a pondo ti Ilocos Sur kas kangrunaan a probinsia nga agmulmula iti tabako a birhinia. Impakaammona a ti bingay dagiti probinsia, ken LGU ket maibasar iti kaadu dagiti produktoda a tabako a birhinia.

Impakaammona nga iti Ilocos Sur ket naka-fix ti tinawen a bingay dagiti ili ken siudad a saan nga agmulmula iti tabako a birhinia, nga iti agdama, adda bingay ti Santa, Vigan City, Bantay, Caoayan, Santa Catalina, San Vicente ken San Ildefonso a sag-P92 Million a basbassit nga amang ngem dagiti ili nga agmulmula iti daytoy a produkto ta adda pay dagiti P500 a Million agingga iti dandani maysa a billion dagiti tinawen a bingayda.

Inlawlawagna a dakdakkel nga amang ti bingay ti Provincial Governmet ta dumanon pay iti agarup P4 a billion ti naawatna a pondo iti agdama a dagitoy ket maar-aramat kadagiti nagduduma a proyekto ken programa para ti panagdur-as ti probinsia.

Impakaammo ni Mayor Bueno nga umapalda unay kadagiti ili ken siudad nga adu ti produktoda a tabako a birhinia ken adu dagiti tinawen a bi-
ngayda a pondo nga aw-awatenda manipud iti R.A. 7171 fund, ngem awan ti maaramidanda ta “salty” met dagiti apitda no agmulada iti tabako a birhinia. Impalgakna nga adda dagiti ili a babassit ngem nagadu ti tinawen a bingayda iti R.A. 7171 Fund.

Inlawlawag ti Mayor nga iti laksid ti limitado a pondo manipud iti Internal Revenue Allotment ken R.A. 7171 fund ket ikagkagumaan ti lokal a gobierno a padur-asen ti ilida ken kasasaad ti panagbiag dagiti umili. Impanakkelna dagiti programa para iti pannakasaluad ti salun-at dagiti umili, ken ti pannakaipaay ti scholarship grants kadagiti umili nga agadal iti agrikultura, ken panangipaayda iti libre a review classes kadagiti ageksamen iti board examination iti agriculture. Inlawlawagna a saan unay a dakkel a pondo ti maar-aramat kadagiti infrastructure projects iti ilida gapu ta National Government ti mangibakbaklay kadagiti kadakkelan a proyekto ti imprastraktura iti Santa.

Sinalaysay pay ni Mayor Bueno a mabalin pay nga agoperasion ti nagserran a Multi-Line Food Processing Plant ken Tomato Paste Plant a nabangon iti ilida a kukua ti Provincial Government. Impakaammona a naserraan ti operasion dagiti planta gapu iti mismanagement ti Italiano a nagupa, ngem mabalin pay a malukatan manen babaen iti baro a management.

Impakaammona a no dakdakkel laeng koma ti pondo ti Santa manipud iti R.A. 7171 fund ket kabaelanda nga upaan ken maneharen dagiti planta tapno saan a masayang dagiti pasilidad ken makatulongda pay kadagiti mannalon nangruna dagiti agmulmula iti kamatis nga adda madadaan a pagilakuanda kadagiti apitda. Impasingked ni Mayor Bueno a no maangay ti taripnong ti League of Mayors iti Ilocos Sur ket awisenna dagiti mayor ti siudad ken dagiti ili a saan nga agmulmula  iti tabako a birhinia, ken dagiti ili a bassit ti tinawen a bingayda iti R.A. 7171 fund nga agaramidda iti resolusion a maiturong ken ni Governor Ryan Singson ken ti Provincial Government a pagkiddawanda a mayalokaranda iti tinawen a nayon a bingay ti R.A. 7171 fund manipud iti provincial share tapno saanda a maudi iti panagdur-as ken ad-adu ti maipaayda a pagimbagan ken serbisio kadagiti umili. Impalgakna ti namnamana ken dagiti padana a mayor a palugodan ti Provincial Government ti kiddawda ta nakaad-adun dagiti tinawen a provincial share, ken maiserbi met laeng a nayon a pondo kadagiti ili ken siudad a sakupen ti Ilocos Sur a bassit ti tinawen a bingayda manipud iti R.A. 7171 fund.