NDAYON NI LAGIP: Ti Ik-ikutak a Palimed (Maikadua a paset)

Wen, Manong Danny, kaarignan nagdakes a tagtagainep daytoy ik-ikutak a palimed a saan a mamagtalna kaniak ken mangburburibor iti panunotko kadagiti rabii a panagmaymaysak. Nagbalinen ti palimedko a maysa a batibat a mangisangbay iti aliaw iti natalinaay a panagbiagko.

Kinapudnona, Manong Danny, adda dagiti rabii a maslep ti punganko no kasdiay nga umassibay kaniak ti napalabas… nadagem a pasamak… a makaigapu iti panagbutengko a mangaklon iti ayat dagiti nagarem kaniak. Apay a napasamak kaniak daytoy? nakunak iti bagik. Diak maako a daytoyto a palimedko ti puon ti pakarakrakan ti umok a bangonenmi iti lalaki a mangisaklang kaniak iti sanguanan ti altar.

Wen, mabutengak, Manong Danny, nga agayat gapu iti maysa a napasamak a diak nagay-ayatan. Malaksid kadagiti dadakkelko, awanen ti sabali pay a makaammo iti sekretok. Diak impalgak ti palimedko uray iti kaasitgan a pagayamko, ni Elsie.

Naglabas ngarud dagiti tawen a kastoy ti dalan ti biagko: adda dagiti mailaw-an nga agdaton kaniak ngem saanko nga italtalek agingga iti maupay ken umadayoda.

Naminsan, bayat ti panagmeriendami ken ni Elsie, sinaludsodna kaniak: β€œPudno kadi a man-haterka?”

β€œApay a kasta ti saludsodmo?” nakunak nupay ammokon ti turongen ti saona.

β€œAwan met ti pagkunaak kadagiti nagdaton kenka. Panagkitak, agbalinda a naimbag a kaayan-ayat ken asawa. No saanka a man-hater, ania ti gapu nga uray maysa kadakuada, awan ti inaklonmo?”

β€œIbagata laengen a diak pay nasarakan ti lalaki a mamagpitik iti pusok,” nakunak.

β€œAy, no kasta ti kinapilim, amangan no makapilika iti kuggangi,” inyangaw ni Elsie.

β€œUray no kuggangi no kapkapnekak nga ay-ayatennak a sipupuso ken sidadarisay,” inkatawak.

Ngem diak ninamnama a dumteng ti lalaki a mamagbaliw iti panirigak iti biag. Diak malipatan dayta a petsa: Enero 25, 2008.

Agil-iladak iti salas nga agbasbasa iti daan a komiks idi adda agtugtog iti ridaw. Saanko nga inkankano. Agmaymaysaak ta napan nagbasa ni Elsie. Addan iti maudi a tukad ti kinamaestra iti University of Northern Philippines ditoy Candon.

Naulit ti tugtog. Kapilitan a timmakderak. Inlukatko ti ridaw. Naipasabat iti matak ti naamo a rupa ti maysa a lalaki a pattapattak nga inauna ngem siak iti maysa wenno dua a tawen. Idi immisem, kasla limmawag ti salas iti panagkitak.

β€œAdda kadi ni Elsie, ading?” inamadna.

β€œAwan, Manong,” nakunak. β€œDi pay simmangpet. Apay kadi?”

β€œSiak ni Andy, ti inauna a kabsatna,” inyam-ammona ti bagina. β€œSaan a makaumay ni Mamang ta adda nasken nga asikasuenna isu a siak ti binaonna nga umay mangted iti alawansna.”

β€œAy, sika ti manongna?” nakunak. β€œAwan ti nasarsarita kaniak ni Elsie a kabsatna a lalaki.”

β€œAwan met ti nadakdakamatna a napintas a kakaserana,” kinuna ni Andy.

β€œBoleroka gayam,” nakunak ngem nariknak ti ilalabaga ti pingpingko.

β€œDi kadi mabalin ti sumrek ta urayek dita uneg?” pinerrengnak sa immisem.

Manong Danny, diak ammo ngem uray la nagtibbayo ti barukongko iti dayta a panangmatmatna kaniak. Iti dayta a darikmat, naamirisko a dimtengen ti lalaki a namagpitik iti pusok!

(Maituloyto)