Negosiante a Taiwanese interesadoda nga agibaut investments iti Ilocos Sur

VIGAN CITY – Sabali pay a grupo dagiti negosiante a ganggannaet ti bimmisita iti Ilocos Sur itay nabiit tapno umayda kitaen dagiti posible a negosio nga ipuonanda.

Impalgak ni Gov. Luis “Chavit” Singson a sinangaili ti gobierno probinsial ti Ilocos Sur ti delegasion dagiti Taiwanese investors a bimmisita iti probinsia idi Oktubre 21-22 tapno umayda kitaen dagiti posible a negosio a pangitapoganda iti investments ditoy.

“Maysa daytoy a grupo kadagiti adu a foreign investors a kaum-umantayo tapno mangipasdekda iti negosio iti Ilocos Sur a makatulongto iti pannakaingato ti klase ti panagbiag ken job generation iti masakbayan,” kinuna ti gobernador.

Impresentar met ni Provincial Planning and Development Coordinator Dr. Enrie Mendoza II ti profile ti probinsia kadagiti bisita bayat ti maysa a briefing iti Vigan Plaza Hotel. Nagsentro ti presentasionna iti cultural, health, agri-ventures investments and trade mission (C.H.A.V.I.T. mission) a nakaipakitaan ti agdama a kasasaad ti Ilocos Sur, dagiti sektor a mabalin a sumrekan dagiti agipupuonan, dagiti sektor a saan pay unay a na-develop ken dadduma pay a banag a mangipakita a nasayaat a pagnegosioan ti Ilocos Sur.

Babaen ti presentasion, inlawlawag ni Mendoza a sakbay pay laeng ti tiempo ti Kastila, addan koneksion iti nagbaetan dagiti Ilokano ken dagiti Tsino. Babaen ti pannakausar dagiti puerto, addan dagiti simmanglad a Tsino ditoy a nagimaro kadagiti produktoda sada naggatang met iti produkto dagiti Ilokano nga inyawidda iti pagilianda. Sumagmamano pay kadagiti negosiante a Tsino ti nakiasawa kadagiti natibo.

“Kayat ni Gov. Singson a mabiag manen dayta a koneksion iti nagbaetan dagiti dua a pagilian babaen ti panangiprioridadna iti rehabilitasion dagiti puerto iti probinsia,” kinuna ni Mendoza.

Impasiar pay ti provincial tourism office dagiti Taiwanese kadagiti agduduma a lugar iti probinsia kas iti Vigan Heritage Village, ti karayan ti Bantaoay, ti nagdissuan ti dati a Pandan Port iti Caoayan ken dadduma pay.#