Negosiante, biktima ti Salisi Gang

CANDON CITY – Aganay┬á P90,000.00 ti kuarta ken alahas ti napukaw ti maysa a negosiante a biktima ti Salisi Gang idiay San Antonio ditoy siudad idi Oktubre 6.

Nagpulong iti polis ditoy ni Maricris Angala, 42, residente iti Gabur Norte, Sta. Cruz, Ilocos Sur a napukaw ti P40,000 a kuartana ken P50,000 ti pategda nga alahas a suspetsaenna a kinurimes ti grupo ti maysa a lalaki ken tallo a babbai a pakairamanan ti maysa a baket.

Segun iti biktima, nagpammarang dagiti suspetsa a kustomerna ket gimmatangda iti black net ken Ultron oil.

Ti negosiante ti nangasikaso iti baket ken ti lalaki idinto a dagiti katulonganna ti naglako iti dua a babai.

Imbaga ti lalaki nga ibatina pay ti black net a ginatangna santo agsubli. Simmaruno metten a pimmanaw dagiti babbai.

Di mabayag, natakuatan ni Angala nga awanen ti Prada a bagna a naglaon iti nasao a gatad, alahas, selpon, ATM ken credit card.

Sinawar dagiti polis dagiti suspetsa ngem didan nasarakan dagitoy.#