Negosiante, ginudas armado a tattao a riding in tandem

SINAIT, Ilocos Sur – Asino ti pudpudno a puntiria dagiti kriminal: ti negosiante wenno ti inhiniero?

Daytoy ti sentro ti panagimbestiga dagiti polis mainaig iti pammapatay a naisayangkat iti igid ti national highway ditoy nga ili idi rabii ti Agosto 31.

Pinaltogan dagiti armado a tattao a nagkalubbon iti motorsiklo ni Leonardo Sanches, 56, negosiante, ken residente iti Sampaloc, Manila bayat ti panagur-urayna ti luganna nga agpa-Manila iti igid ti national highway iti pasado alas 7:00 ti rabii iti nadakamat nga aldaw.

Dagus a natay ni Sanches gapu kadagiti grabe a sugat iti nadumaduma a paset ti bagina.

Naitaray met iti Corpuz Clinic and Hospital ni Engineer Mario Guzman, 50, ken residente iti Barangay Tapao ditoy met laeng nga ili gapu iti sugat iti barukongna ken iti kannigid a luppona.

Saan a naan-ano ni Tapao Barangay Kagawad Federico Rosete ken ti 6-ti tawenna nga anakna.

Sangaili ni Rosete ni Sanches ket intulodna daytoy iti igid ti national highway a pagurayanna iti lugan nga agpa-Manila.

Segun iti panagimbestiga dagiti polis, bayat ti panagur-uray da Sanches iti luganda, nalabsan ida ni Guzman ket simmardeng daytoy sa nakipatpatang ken ni Sanches.

Kellaat, nagsardeng iti asidegda ti maysa a nangisit a motorsiklo a nagluganan dagiti suspek ket pinaltoganda dagiti biktima sada nagpakaskas a naglibas nga agpaabagatan kalpasan ti pammaltog.

Nakarekobre dagiti inbestigador iti 7 a kapsula, ken maysa a buli a nagtaud iti cal .45 iti nakapasamakan ti krimen.

Segun iti polis, awan ti makitada a motibo no apay a papatayen dagiti di nabigbig a suspek ni Sanches a sangsangaili iti Barangay Tapao.

Maysa pay nga anggulo a kitkitaen dagiti inbestigador a ni Guzman ti sinurot dagiti suspek ket pinaltoganda daytoy bayat ti pannakipatpatangna ken ni Sanches.

Iti pannakaisurat daytoy, saan pay a nakasarita dagiti inbestigador ni Guzman a pakaalaanda iti lead iti nasao a pammapatay.#