STA. LUCIA, Ilocos Sur – Maysa a negosiante ti tinambang dagiti armado a lallaki a puon ti nakatayanna.
Nagudas ti biag ni Loric Rivera, 34, negosiante, residente iti Barangay Bical ditoy gapu kadagiti sugatna iti nadumaduma a paset ti bagina.
Segun iti report, agdaldaliasat ni Rivera iti barangay road a kumamang iti lugarda idi linabsan ti dua a lalaki a nakalugan ti motorsiklo, sa pinaputokan ti nakasakay iti likud iti sumagmamano a daras.
Nakabig ti biktima ti manibela iti pinagayan a nakatulidanna.
Dimsaag ti triggerman, sana pinaltogan ti biktima a nakatayan daytoy.
Naglibas dagiti suspetsa iti daya a direksion a sumalpot iti kalsada nasional.
Di pay ammo ti motibo ti pammapatay.#