Negosiante, hinold-ap, pinaltogan armado a tattao

NARVACAN, Ilocos Sur – Nagasat daytoy biktima ta saan a napuruan iti panangpaltog dagiti nanghold-ap kenkuana idi rabii ti Septiembre 11 iti Barangay Abuor, ditoy nga ili.

Naitaray ni Rodolfo Javillo y Dela Cruz, 44, naasawaan, negosiante, residente iti nadakamat a barangay iti Central Ilocos Sur District Hospital iti Barangay Paratong ditoy nga ili para iti pannakaagas ti sugatna iti tengnged gapuanan ti panangpaltog kenkuana ti maysa kadagiti dua a suspek a nanghold-ap kenkuana.

Segun iti biktima, adda iti dalanna nga aggawid a nakalugan iti owner type jeep ket bayat a sarsarunuenna ti maysa a truck ken tricycle, mapapati a pinaltogan dagiti suspek a dina ammo a sumursurot kenkuana ti makannigid a likud a pilid ti luganna a puon ti pannaka-flat tire daytoy.

Inasitgan ti maysa kadagiti suspek ti biktima, pinaturonganna daytoy iti paltog sana ginammatan ti bag iti abayna a naglaon iti P50,000 ken nadumaduma a tseke.

Kinuna ni Javillo a pinadasna ti nagkitakit ngem pinaltogan dagiti suspek a nakatamaan ti tengngedna.

Naglibas dagiti suspek a nakalugan iti motorsikloda iti saan nga ammo a direksion.

Nakarekobre dagiti nagresponde a polis iti dua a kapsula a nagtaud iti cal. 45 iti nakapasamakan ti krimen .

Iti pannakaisurat daytoy, di pay ammo ti kinasiasino dagiti nagisayangkat iti hold-ap ken kasano nga ammoda nga adda iggem ti biktima a kuarta.#