Footer

Negosiante, inallilaw nanglimlimo a kustomer

VIGAN CITY –  Kadagitoy a tiempo, saankayo a basta agtalek lattan iti ganggannaet a tao uray disente ti panaglanglangana ta posible a manangallilaw daytoy.

Nagpulong iti polis ni Jesus Bueno, 60, akinkukua ti Lilia’s Store a masarakan iti Jose Singson Street, nga inallilaw ti di pay nabigbig a lalaki a nanglimlimo a kustomer a nakapukawanna iti P1,878.

Segun iti inbestigasion dagiti polis, simrek ti suspetsa iti pagtagilakuan ni Bueno, inyam-ammona ti bagina nga empleado ti Department of Interior and Local Government  ket nagorder iti 6 a kahon ti Lagerlite, maysa a barra ti sabon ken sangapakete a pusporo.

Simmublat kano ti lalaki ken ni Bueno iti P1,878 ta adda pay a sabali a gatangenna ket isublinanto daytoy agraman ti pagbayadna apaman a maideliber dagiti inorderna iti opisinada.

Napan indeliber ni Bueno ti inorder ti lalaki iti opisina ti DILG ngem imbaga dagiti empleado a saanda a nagorder iti mainom iti pagtagilakuan ni Bueno.

Adda umasping a kastoy modus operandi ti maysa a lalaki a nakabiktimaan ti dua a pasdek-negosio idi napan a tawen.

Idi Agosto idi napan a tawen, maysa a lalaki a nagpammarang a polis ti napan gimmatang iti 50 a waffles ken 40 a soft drinks nga aggatad iti P1,230 iti Pinoy Waffle Corner.

Inted pay dagiti biktima ti P770 a supli ti P2,000 nga imbaga ti lalaki a pagbayadna apaman nga agsubli.

Uray anniniwan ti lalaki, saanen a nakita dagiti biktima.

Idi maikadua a lawas ti Marso itay met la napan a tawen, maysa a lalaki a nanglimlimo a polis ti napan gimmatang iti dua a sako a bagas nga agpateg iti P2,200 iti maysa a tienda iti public market ditoy .

Imbaga ti lalaki a suplian ti negosiante ti P4,000 a kuarta nga itedna apaman a makadanonda iti police station.

Nangted ti negosiante iti P1,800 sana binaon ti kaanakanna a balasitang a mangkuyog iti lalaki.

Pinasardeng ti lalaki ti traysikel iti abay ti maysa a pasdek-panganan nga asideg iti police station sana sinublat ti selpon ti balasitang ket nagkuenta. Kalpasanna, imbagana iti balasitang nga aguray ta panna alaen ti pagbayadna.

Saanen a nagsubli.

Kitkitaen dagiti inbestigador  no daytoy met laeng a lalaki ti nangloko ken ni Bueno.#