SAN FERNANDO CITY – Maysa a babai a negosiante ti kinikilan ti maysa a mapapati a komander ti CPP/NPA idi malem ti Mayo 6.
Nainaganan ti biktima a maysa a Vilma Loquero y Rafael, 50, naasawaan, proprietor ti Paeng’s Military Supply and General Merchandize.
Kinuna ni Loquero a nakaawat iti tawag manipud iti selpon a naggapu iti maysa a lalaki a nagpabigbig a “Ka Roger” ken komander ti CPP/NPA nga agdakdakiwas iti hurisdiksion ti La Union ket dinawatan daytoy ti negosiante iti P20,000.00 a mausar kano a pangtulong kadagiti nasugatan a tropada.
Segun iti biktima, timmawar iti timmawag a P5,000.00 laeng ti maitedna. Immannugot ni “Ka Roger” ket imbagana a maideposito ti kuarta iti Smart Padala a nakaadres ken ni Marlyn B. Fernandes.
Agtultuloy ti panagimbestiga ti kapolisan mainaig iti daytoy a pulong. (Report manipud iti PRO 1)