Negosiante, maikatlon a daras a natakawan iti pakitadi a manok

SAN ESTEBAN, Ilocos Sur – Dua manen a manok a pakipallot ti natakaw iti paraangan ti maysa a negosiante ditoy idi Nobiembre 12.

Nagpulong ni Ruben Eleccion, residente iti Barangay Poblacion a nariinganna laengen a natakaw ti dua a teksas a manokna a nakawayway iti sanguanan ti balayda idi rabii ti Nobiembre 11.

Agbalor iti sag-P15,000 dagiti natakaw a manok.

Kanaig daytoy, nangitanggaya ni Eleccion iti gunggona a P10,000 iti asinoman a makaited iti impormasion iti kinasiasino dagiti nangtakaw iti manokna.

Iti daytoy a tawen,  namitlon a daras a natakawan iti pakipallot a manok ni Eleccion idinto nga asideg laeng ti balayna iti police station ditoy nga ili.

Immuna a natakawan ni Eleccion iti innem a pakitadi a manok idi Enero, dua idi Agosto ken dua iti kaudian, idi Nobiembre 12.

Kabayatanna, limapulo ket innem a broiler chicken ti naireport a natakaw iti maysa a poultry farm iti Barangay Nalasin, Sto. Domingo, Ilocos Sur idi Nobiembre 16.

Nainaganan dagiti suspek iti pannakatakaw dagiti nasao a manok a da Jayson Rodrigues y Andres, 21, baro, residentge iti Barangay Asilang, San Juan; Jonathan Ventura y Nelson, 18, residente iti Barangay Puerta Real, Sto. Domingo; ken Jerwin Miranda y Gabina, 21, baro, residente iti Barangay Baracbac, Sinait, Ilocos Sur, agpapada a katulongan iti talon ni Mocecil Soliven y Medrano, 37, naasawaan, ken residente iti Barangay Quimmarayan, Sto. Domingo.

Iti inisial a panagimbestiga dagiti polis, mapapati a tinakaw dagiti nasao a manok idi agarup 9:30 ti rabii ti Nobiembre 15 sada impan iti residente ti maysa a Florentino Tajon y Sebastian, 60, naasawaan ken residente iti Barangay Nalasin, Sto. Domingo.

Agpateg amin iti P7,000 dagiti natakaw a manok.#