Negosiante, mannalon, nagudas babaen ti paltog

NARVACAN, Ilocos Sur – Nakurang a dua a lawas sakbay ti Paskua, dua ti nagudas babaen ti paltog iti Barangay Pug-os, Sinait, Ilocos Sur ken Barangay Orence, Narvacan idi Disiembre 16.

Napaltogan a puon ti pannakatayda da Elpidio Abella, Jr. y Rabina, 33, naasawaan, mannalon, ken residente iti Barangay Tubigay, Sinait, ken ni Jojo Estacio y Antonio, 38, naasawaan, negosiante ken residente iti Barangay Orence, ditoy nga ili babaen dagiti armado a tattao.

Pinaltogan dagiti di nabigbig a lallaki a nagkalugan iti motorsiklo ni Abella bayat ti panagdaliasatna iti national highway a sakup ti Barangay Pug-os  a nakalugan iti Honda TMX 155 idi agarup 10:50 ti bigat ti nadakamat a petsa a nagsagrapanna kadagiti sugat iti ulo, barukong, ken makannawan a takiagna.

Naitaray ni Abella iti Sinait District Hospital ngem naideklara nga awanen ti biagna idi maidanon iti balay-pagagasan.

Kalpasan ti pammaltog, naglibas dagiti suspek iti amianan a direksion.

Nakarekobre dagiti inbestigador iti 6 a kapsula manipud iti cal. 45 iti crime scene.

Mapapati a dati a susik ti motibo ti pammapatay.

Kabayatanna, mapapati nga inuray ti di nabigbig a suspek ni Estacio a makaawid manipud iti galiera sana pinaltogan iti sumagmamano a daras iti sanguanan ti ruangan ti balayna.

Ngem nupay nagsagrap ni Estacio kadagiti sugat iti nadumaduma a paset ti bagina, nakataray a napan iti kataltalonan iti lauden ti balayna ket ditoy ti nakapasagan ken nakasarakan dagiti nagresponde a polis kenkuana.

Segun iti maysa a Manuel Supnet, linabsan ti biktima iti nagkurusan ti dalan nga agturong iti balayna ket sumagmamano a darikmat kalpasanna, nakangeg iti nagsasaruno a paltog iti direksion ti biktima.

Nakita ni Supnet ti natuang a motorsiklo ti biktima iti sanguanan ti ruangan ket impakaammona daytoy kadagiti kakabagian ti biktima sana inreport ti insidente iti polis.

Nakarekobre dagiti polis iti 4 a basyo manipud iti cal. 45 iti ruangan ti balay ti biktima.

Iti pannakaisurat daytoy, di pay ammo ti motibo ti pammapatay.#