Negosiante, nabiktima ti baket a nagpammarang kustomer

BANTAY, Ilocos Sur – Maysa a negosiante ti natakawan iti kuarta iti mismo a food house nga imatonanna iti public market ditoy idi malem ti Abril 2.

Iti pulongna iti polis, kinuna ni Mary Virtudez y delos Santos, 54, naasawaan, akinkukua iti Maricris Joyce Food House a masarakan iti Bantay Arcade, Zone 6, Bantay, Ilocos Sur, ken residente iti Barangay Calautit, Sto. Domingo, Ilocos Sur, a natakaw ti bagna a naglaon iti P7,000.00, ID cards ken tulbek ket suspetsana a sinikuat ti babai nga adda kaduana nga ubing a nagpammarang a kustomer ken nagorder iti makan kenkuana.

Iti panagimbestiga dagiti polis, naammuan nga idi rimmuarda iti panganan, naglugan ti di nabigbig a babai ken ti ubing iti traysikel ket nagpaitulodda iti drive-in iti Zone 5, Bantay, limmuganda iti Florida Bus nga agpaabagatan sada bimmaba met laeng iti sanguanan ti Mel Sol Tourist Inn sada naglibas iti saan nga ammo a direksion.

Nangisayangkat dagiti polis-Bantay iti pursuit operation ngem saandan a nasapulan pay dagiti dua.#