Negosiante, napaltoganna ti sakana

SAN ILDEFONSO, Ilocos Sur – Dakkel a sakit ti ulo ti impaay ti pannakapaltog ni Vincent Umoso y Gaoiran iti sakana idi bigat ti Hunio 23.

Kalpasan ti pannakaagas ti sakana gapu iti pannakapaltogna, impaima dagiti polis-San Vicente ni Umoso, 28, naasawaan, negosiante, ken agdama nga agnaed iti Camella Subdivision, Cabaroan, Bantay, Ilocos Sur kadagiti polis-San Ildefonso para iti dokumentasion ken disposision.

Segun iti report, bayat a nakaparking ti white Ford Everest a lugan ni Umoso iti igid ti national highway a sakup ti San Ildefonso, Ilocos Sur, sinukimatna ti paltogna a maysa a Glock Gen 3 ket aksidente a napaltoganna ti makannawan a sakana.

Mismo nga intaray ni Umisu ti bagina.

Nupay kasta, adda naipakita ni Umoso a temporario a lisensia nga agtagikua ken agikut iti paltog, sertipiko ti panagikut ken panagtagikua iti para iti indibidual, temporario a rehistrasion ti paltog ken otoridad nga agikuyog iti firearms ken ammunition/PTT a naiyisio amin idi Agosto 2015.#