Negosiante, pinaltogan ti padana a negosiante

STA. MARIA, Ilocos Sur – Mapapati a dati a susik ti ramut ti pannakapaltog ti maysa a negosiante iti tiendaan publiko ditoy idi agsapa ti Enero 19.

Innaganan ti polis ti biktima a ni August Eugenio y Genita, 33, naasawaan, ken residente iti Barangay Sta. Lucia, Narvacan, Ilocos Sur idinto nga inarestoda ti maysa nga Edwin Cabebe y Castillo, negosiante ken residente iti Barangay San Antonio, Narvacan kalpasan ti follow-up operation nga insayangkatda iti dayta met laeng a petsa.

Segun iti polis, adda di nagkinnaawatan da Eugenio ken ni Cabebe idi bulan ti Disiembre idi napan a tawen.

Iti panagimbestiga dagiti otoridad, napan inurnos ni Eugenio ti ukay-ukay ken sinelas a negosiona iti puestona iti public market ditoy nga ili idi agarup 4:55 ti bigat ti Enero 19.

Kinuna ti kapolisan ditoy a napan immisbo ni Eugenio iti abagatan a paset ti tiendaan idi mapapati a sinurot ni Cabebe sana pinaltoganĀ  ti biktima iti namindua a nagsagrapan daytoy iti sugat iti likudna.

Naitaray ni Eugenio iti Central Ilocos Sur District Hospital sa naiyalis iti Gabriela Silang General Hospital, Tamag, Vigan City para iti pannakataming dagiti sugatna.

Naglibas ti suspek babaen ti maysa a motorsiklo, kuyogna ti paltogna.

Ngem maibasar iti iti statement ni Eugenio kadagiti polis, innagananna ni Cabebe nga isu ti pimmaltog kenkuana maigapu iti susikda iti kallabes.

Nakarekobre dagiti inbestigador iti dua a kapsula manipud iti cal. 45 iti nakapasamakan ti krimen.

Naaresto ni Cabebe iti met laeng tiendaan publiko idi agarup 8:00 ti bigat iti dayta met la a petsa naipan iti Candon City Crime Laboratory Office para iti paraffin test.

Iti pannakaisurat daytoy, yur-uray ti polis ditoy ti resulta ti pannakaamiris ti ima ni Cabebe no positibo iti pulbora.#