CERVANTES, Ilocos Sur – Saanen a naidanon a sibibiag ti maysa a negosiante kalpasan a pinaltogan dagiti armado a tattao a nagkasakay iti motorsiklo iti mismo a ruangan ti balayna sadiay Barangay Concepcion, ditoy nga ili idi rabii ti Nobiembre 18.
Dead on arrival iti Bessang Pass Memorial Hospital, ni Joselito Ambat y Abaya, 53, naasawaan, gapu kadagiti sinagrapna a sugat.
Segun iti inisial nga inbestigasion dagiti polis, kagapgapu ti biktima iti biliaran a negosiona ket kaserserrekna iti gate ti balayna a nakalugan iti motorsiklona idi pinaltogan dagiti suspek a nagkasakay iti motorsiklo.
Nabaelan pay laeng ti biktima a pinataray ti luganna iti agarup 25 metro sakbay a naikras.
Naammuan a napakatan ti biktima iti balidasion mainaig iti mapapati a pannakainbolbarna iti droga iti napalabas.#