Footer

Negosiante, taktakawan tindera, trabahadorna

SANTA, Ilocos Sur – Awan ti dakes nga aramid a dinto maibutaktak.

Itay nabiit, naireport nga agipuspuslit gayam iti tagilako ti maysa a tindera ken dagiti kakumplotna a trabahador iti laksid ti pannakaammo ti akinkukua iti pagtagilakuan a pagpapaayanda. Ti modus operandida: iramanda ti ipuslitda a tagilako iti ginatang dagiti sumagmamano a kustomer sadanto pabayadan iti nalaklaka iti ruar.

Idi agarup 11:45 ti Disiembre 15, nagpulong iti polis ni Caroline Burgonio y Cardenas, 45, negosiante, ken residente iti Barangay Marcos District, ditoy nga ili, a nasukalanna nga agipuspuslit ti maysa a tinderana a nabigbig idi agangay a ni Janelle Betita y Rendon, 22, awanan asawa, ken residente iti Barangay Mabilbila Sur, iti saan a nabayadan a tagilako iti maysa a kustomer a naggatang iti pagtagilakuanna.

Nasukalan ni Burgonio ti modus operandi idi rinebiona ti footage ti CCTV a naikabit iti uneg ti pagtagilakuanna idi Disiembre 14.

Kas maibatay iti footage ti nasao a CCTV, idi agarup 12:30 ti malem ti Disiembre 11, inkabil ni Betita ti 4 rims ti Fortune cigarette nga agbalor iti P1,200.00 iti maysa a plastic bag sana inraman iti grocery items a ginatang ti maysa a Demjie Surtido y Quedeng, 24, naasawaan, tricycle driver ken residente iti Barangay Magsaysay, Santa, Ilocos Sur.

Idi manen Disiembre 14, nairekord iti CCTV a maysa a box ti Ginebra San Miguel ken 2 rims ti Fortune nga agbalor amin iti P1,600.00 ti inraman ni Betita kadagiti grocery items a ginatang ti maysa a Cecilia Quito y Barrientos, 63, naasawaan, ken residente iti Barangay Calungboyan.

Inawis ti polis-Santa dagiti nainbolbar a tattao sada napagsaludsodan, pakairamanan dagiti helpers a da Andrea Molina y Dameg, 25, naasawaan, residente iti Pasungol; Joseph Bueno y Cantano, 35, awanan asawa, residente iti Calungbuyan ken Rose Bahalay y Ubot, 38, naasawaan ken residente iti Brgy Mabilbila Sur .

Inannugot da Molina, Bueno, ken Bahalay nga adda impuslitda a grocery items a saan nga ammo ti cashier/akinkukua.

Ngem kinuna ni Quito a nangted iti sag-P500.00 kada Bueno ken Betita kas bayad dagiti naipuslit a tagilako.

Nakarekobre dagiti polis kadagiti naipuslit a grocery items manipud ken ni Surtido.

Agtultuloy ti panagimbestiga dagiti polis mainaig iti nadakamat a panagipuslit iti tagilako. (Tawid News Team)