Negosiante ti baboy, naaresto

SAN VICENTE, Ilocos Sur – Inaresto dagiti polis ditoy ti maysa a negosiante gapu iti panaglabsingna iti ordinansa pakaseknan kadagiti maiserrek a baboy iti probinsia.

Inaresto dagiti polis ni Cesar Lazo y Ritumban, 42, naasawaan, ken residente iti Barangay Bayubay Norte, San Vicente Ilocos Sur babaen iti bileg ti warrant of arrest nga inyisio ni Judge Francisco Ante, Jr. ti MTCC, Vigan City.

Sumangsango ni Lazo iti kaso a panaglabsing iti Section 4(a) ken 4(b) wenno Animal Quarantine Ordinance of the Province of Ilocos Sur a nai-docket babaen ti CC No. 14512-13.

Iti pannakaisurat daytoy, adda iti kustodia ti San Vicente police ni Lazo para iti naan-anay a disposision.

Iti napalabas, nasukalan pay Lazo a nagipuslit kadagiti karne ti baboy a mailako iti tiendaan publiko iti Vigan a saan a naglasat iti inspeksion ti city slaughterhouse officer.#