Negosiante ti baka, nasarakan a napapatay

SAN ILDEFONSO, Ilocos Sur – Panagtakaw ti kitkitaen dagiti inbestigador a motibo iti pannakapapatay ti maysa a negosiante ti baka idi malem ti Marso 29.

Iti inisial a panagimbestiga dagiti polis, malaksid ti kuentas ti biktima, awan ti petakana a mapapati a naglaon iti paggatangna iti baka.

Segun iti asawa ti biktima, adda latta ikuykuyog ti asawana a kuarta no rummuar a mapan aggatang iti baka.

Nasarakan ti daradara a bangkay ni Feliciano Tabula y Tactay, 65, naasawaan, agnegnegosio iti buy and sell iti baka, ken residente iti Barangay Lussoc, Sto. Domingo, Ilocos Sur iti langalang a paset iti asideg ti karayan iti Barangay Bongro ditoy nga ili idi pasado alas 2:00 ti malem ti Marso 29.

Nagturong dagiti polis iti nadakamat a lugar kalpasan a nakaawatda iti report  manipud iti tallo a lallaki a nainaganan Mario Dayag y Gazmen, 53, naasawaan, barangay tanod; Ronald Taculog y Palomares, 25, naasawaan ken Gilbert Panglao y Pacpaco, 16, baro, agpapada a residente iti Barangay Bongro a nakitada ti biktima a nadigos iti dara iti nadakamat a lugar.

Nadatngan dagiti nagresponde a polis ti motorsiklo ti biktima iti asideg ti nakapasamakan ti krimen.

Iti inisial nga inbestigasion ti SOCO team nga indauluan ni PCI Leonard Arce ti Ilocos Sur PPO, limtuad a nagsagrap ti biktima iti nadumaduma a sugat a gapuanan ti paltog iti ulona a nakaigapuan ti dagus nga ipapatayna.

Iti pannakaisurat daytoy, saan pay a narekobre ken no ania a kalibre ti paltog a naaramat iti krimen, kasta met ti kinasiasino dagiti nangisayangkat iti krimen.#