Footer

Negosiante ti RTW, tinakawan iti masikog

MANGALDAN, Pangasinan – Maysa a negosiante ti natakawan idi 6:30 ti sardam ti Nobiembre 12, daytoy a tawen.

Nagpulong ti biktima a ni Jennifer Cancino Dela Cruz, 39, awanan asawa, negosiante ken agnaed iti Brgy Banaoang, ditoy a munisipio, iti kuerpo ti polisia maigapu iti panakatakaw ti bagna a naglaon iti P50,000, BDO atm card, professional driver’s license, postal ID card, Philhealth card, tulbek ken dadduma pay a ramit.

Iti inbestigasion dagiti panakabagi ti linteg, naamuan a natiliw iti CCTV ti maysa a babai a masikog a simrek manipud iti makinlikod a ruangan ti pagtagilakuan.

Gapu ta manarimaan ti panaglaklako ti negosiante iti sanguanan, saanna a nadlaw ti panangsipdot ti masikog iti bagna a nakaparabaw iti tugaw. Iti met laeng likudan ti pagtagilakuan ti rimuaran ti babai a mannanakaw.

Nainget met ti panangsapsapul ita dagiti panakabagi ti linteg iti masikog a mannanakaw. (Tawid News Team)